Presidenti rus Vladimir Putin vlerësoi të enjten se gati 5,000 njerëz u vranë në luftimet midis Azerbajxhanit dhe Armenisë për rajonin e diskutueshëm Nago-Karabak.
“Ka humbje nga të dy palët,” tha ai për rritjen e konfliktit.
Të dy ish-republikat sovjetike kanë luftuar për dekada me radhë për këtë rajon malor, me luftimet më të ashpra që shpërthyen në shtator.
Territori, i cili është kontrolluar nga ushtria armene e krishterë që nga mesi i viteve 1990, konsiderohet nga KB si pjesë e Azerbajxhanit kryesisht musliman. Deri të enjten, Armenia kishte raportuar zyrtarisht 874 ushtarë të vrarë së bashku me 30 civilë.
Azerbajxhani tha se 63 civilë u vranë, por nuk ka lëshuar ende të dhëna për ushtrinë. Moska ka lidhje me të dy ish-republikat sovjetike, por një armëpushim i kohëve të fundit i ndërmjetësuar nga Rusia ka dështuar të ndalojë luftimet.
Putini tha se po llogariste ndikimin e SHBA për një zgjidhje paqësore të konfliktit. Ministrat e jashtëm të Armenisë dhe Azerbajxhanit janë planifikuar të takohen për bisedime në Uashington të premten.
“Unë me të vërtetë shpresoj që partnerët tanë amerikanë të punojnë në unison me ne,” tha Putin.
Sipas Departamentit të Shtetit, Sekretari Mike Pompeo duhet të zhvillojë takime të ndara me ministrat Jeyhun Bayramov dhe Zohrab Mnatsakanyan.
Ndërkohë, një burim nga Pallati Elysee thotë se Presidenti francez Emmanuel Macron ka folur me udhëheqësit e Azerbajxhanit dhe Armenisë dhe bëri thirrje për t’i dhënë fund konfliktit mbi rajonin e diskutueshëm.
Franca do të dërgojë ndihmë mjekësore për të plagosurit, me detaje të mëtejshme që do të lëshohen në ditët në vijim. /tesheshi.com/
