Profesori i njohur në Universitetin Amerikan John Hopkins dhe analisti i politikës së jashtme Edward P. Joseph, i cili shërbeu në Bosnje dhe Kosovë, shkruan se, ashtu siç duhet falënderuar presidenti rus Vladimir Putin për “injektimin e jetës në NATO”, edhe Sergei Lavrov, kreu i diplomacisë ruse, i dha “puthjen e vdekjes” projektit “Open Balkans”.
“Kjo ide e administratës Trump po avancon axhendën e partnerit strategjik të Rusisë në rajon, Serbisë, nën udhëheqjen e Aleksandar Vuçiçit”, ka shkruar Joseph.
Duke komentuar anullimin e vizitës në Beograd, si pasojë e bllokimit të hapësirës ajrore nga tre vende – Mali i Zi, Maqedonia dhe Bullgaria – Lavrov përmendi për herë të parë projektin e diskutueshëm “Open Balkan”, për më tepër, një ditë pas samitit të radhës në Ohër. “NATO dhe BE duan ta kthejnë ‘Ballkanin e Hapur’ në projektin e tyre të quajtur ‘Ballkani i Mbyllur’”, tha Lavrov, duke dhënë të kuptuar kësisoj se ky projekt mbështetet nga Moska.
Ai shtoi se liderët e Brukselit “nuk donin që ne të konfirmonim qëndrimin e Rusisë për çështjen e Kosovës dhe Bosnjes he të shprehim mbështetjen për nismën e Beogradit për Ballkanin e Hapur”.
Sipas gazetës beogradase Danas, kështu, siç interpretohet, Lavrov në të vërtetë ka pranuar se ideja e kujt është “Ballkani i Hapur”.
Për më tepër, Joseph vuri në dukje se media kryesore ruse në Serbi, Sputnik Serbia, mbështet vazhdimisht idenë e një Ballkani të hapur.
“Dhe pse jo?“, pyeti ky autor.
“Ballkani i Hapur është një thirrje e hapur për Vuçiçin që të përdorë madhështinë ekonomike të Serbisë për avantazhe politike, pa kufizime politike apo vlera të BE-së. ‘Ballkani i Hapur’ është po aq “bota serbe”, ka shkruar Joseph.
Ai shpjegoi se, duke besuar se Vuçiç donte të anëtarësohej në BE, zyrtarët amerikanë e pranuan vërtet idenë se “tregtia” është e barabartë me “besimin”.
“Ajo që duhet të merret parasysh është natyra e regjimit tregtar. Pyesni Ukrainën: deri më 24 shkurt, Rusia ishte partneri kryesor tregtar i Kievit për importet dhe eksportet,” tha ai, duke shtuar se Japonia, Koreja e Jugut apo Tajvani gjithashtu duhet të pyeten nëse tregtia ka ndërtuar besim me Kinën?
Është e njëjta histori në Ballkan. Serbia është partneri i parë tregtar i Malit të Zi në importe dhe eksporte, por Beogradi renditet i fundit për sa i përket besimit. Mbështetja e fundit e kryeministrit malazez Dritan Abazovic për ‘Ballkanin e Hapur’ ka thelluar ndarjet në vend,” arsyetoi ai.
“Çdo vend ballkanik që përballet me një kërcënim të drejtpërdrejtë nga Serbia është skeptik, nëse jo i dyshimtë, për ‘Ballkanin e Hapur’,” paralajmëroi Joseph. /tesheshi.com/
