Ish-presidenti i Federatës Spanjolle të Futbollit (RFEF), Luis Rubiales, i akuzuar për “sulm seksual” sepse puthi futbollisten Jennifer Hermoso, tha të premten në një gjykatë në Madrid se nuk ndihet fajtor.
Në të njëjtën kohë, Prokuroria e Shtetit spanjoll kërkoi nga gjyqtari hetues që të ndalojë Rubiales që të afrohet më pak se 500 metra nga lojtarja, e cila e ka denoncuar në prokurori për puthjen e tij pas përfundimit të Botërorit.
Prokuroria e Shtetit kërkon që atij t’i ndalohet komunikimi me lojtaren, drejtpërdrejt ose me ndërmjetës, dhe të paraqitet në gjykatë çdo pesëmbëdhjetë ditë. Gjykatësi Francisco de Jorge nuk ka vendosur ende për këtë kërkesë.
Të premten, Rubiales erdhi në gjykatën e Madridit i shoqëruar nga avokati i tij me ftesë të gjyqtarit hetues. Gazetarë të shumtë u mblodhën para gjykatës, por 46-vjeçari Rubiales nuk ka bërë asnjë deklaratë. Një burim gjyqësor më vonë u tha gazetarëve se ai ishte deklaruar i pafajshëm. Ai iu përgjigj të gjitha pyetjeve të gjyqtarëve dhe avokatëve për një orë.
Dorëheqja nën presion
Avokatja e futbollists Hermoso, Carla Vall, përsëriti se klientja e saj “nuk ka dhënë leje për puthjen në gojë” dhe se “e gjithë bota e ka parë videon”.
Që prej datës 20 gusht, kur puthi 33-vjeçaren Hermosa në ceremoninë e medaljes së artë në Sydney, Rubiales ka pohuar se puthja ishte “konsensuale” dhe “reciproke” për shkak të euforisë së fitores 1-0 ndaj Anglisë.
Pavarësisht kritikave të shumta, ai refuzoi të tërhiqej nga posti që mbante që nga maji 2018. Ai dha dorëheqjen vetëm pasi prokuroria e shtetit spanjoll ngriti akuzat për “sulm seksual” dhe “shtrëngim”.
Hermoso, e cila aktualisht ndodhet në Meksikë me klubin e saj Pachuca, i tha zyrës së prokurorit të shtetit në Madrid në fillim të këtij muaji se ajo nuk e miratoi puthjen e Rubiales dhe se RFEF i bëri presion asaj, familjes dhe miqve të saj për të mbrojtur Rubiales. Pachuca bëri të ditur se Hermoso nuk do të bëjë deklarata për media dhe se është e fokusuar të luajë futboll. /tesheshi.com/
