Presidenti i Federatës Spanjolle të Futbollit (RFEF) Luis Rubiales, 46 vjeç, i cili tre javë më parë puthi në buzë krejt shpengueshëm dhe në dukje joerotikisht futbollisten Jennifer Hermoso, dha dorëheqjen nga posti i tij.
Rubiales është tërhequr edhe nga posti i zëvendëspresidentit të Federatës Evropiane të Futbollit UEFA.
“I kam përcjellë presidentit të përkohshëm Pedro Rocha se po jap dorëheqjen si president i federatës”, ka shkruar Rubiales përmes rrjetit social X, dikur Twitter. “E njoftova se të njëjtën gjë kam bërë edhe me postin në UEFA për të gjetur një zëvendësues për postin e zëvendëspresidentit”.
Rubiales është president i Federatës Spanjolle të Futbollit që nga maji 2018.
Kombëtarja spanjolle e meshkujve fitoi Ligën e Kombeve në qershor me një fitore ndaj Kroacisë dhe ekipi i femrave fitoi Kupën e Botës muajin e kaluar me një triumf ndaj Anglisë.
Të premten, Zyra e Prokurorit të Shtetit spanjoll akuzoi Rubiales për “sulm seksual” dhe “shtrëngim” sepse ai e puthi në buzë futbollisten Hermoso, 33 vjeçe, në një moment gëzimi pas Kupës së Botës.
“Unë do ta mbroj nderin tim. Unë do të mbroj pafajësinë time. Unë kam besim në të ardhmen. Unë kam besim në të vërtetën”, tha më pas Rubiales.
Ishte Hermoso ajo që raportoi Rubiales në zyrën e prokurorit të shtetit në Spanjë javën e kaluar. Ndërkohë, në momentin e puthjes ajo nuk pati asnjë lloj reagimi; e pranoi natyrshëm atë, brenda kontekstit të një gëzimi të përbashkët.
Prokuroria e Shtetit kërkon nga gjyqtari hetues në Madrid që të marrë në pyetje Rubiales si të dyshuar dhe Hermoson si viktimë.
E gjitha ndodhi më 20 gusht, në Sidney, kur gjatë dhënies së medaljeve të arta për lojtaret e Spanjës, Rubiales puthi Hermoson.
Ai pretendon se puthja ka ardhur nga euforia e fitores finale 1-0 dhe se ka qenë një akt “konsensual” dhe “i ndërsjelltë” mes dy miqve.
Por katër ditë më vonë, Hermoso tha përmes sindikatës dhe Tëitter-it se ajo nuk i dha leje për t’u puthur dhe se sindikata më pas i bëri presion asaj, familjes dhe miqve të saj për të mbrojtur Rubiales.
Një hetim nëse ka pasur detyrim
Gjyqtari hetues në Madrid do të vendosë nëse do ta pranojë aktakuzën për veprat penale “sulm seksual” dhe “shtrëngim”, apo do të hedhë poshtë akuzat si të pabazuara.
Rubiales deri më tani ka refuzuar të japë dorëheqjen.
Gjykata Administrative e Sporteve Spanjolle (TAD), në të cilën ai u raportua nga organi shtetëror spanjoll, Këshilli i Lartë për Sportet (CSD), do të vendosë gjithashtu për detyrat e tij të vazhdueshme në futboll.
Hermoso udhëtoi nga Madridi në Meksikë javën e kaluar ku iu bashkua skuadrës Pachuca. Ky klub raportoi se ajo nuk do të flasë me shtypin deri në një njoftim të dytë dhe se dëshiron të përqendrohet në të luajtur futboll.
Federata Ndërkombëtare e Futbollit FIFA ka pezulluar Rubiales për 90 ditë, ndërkohë që procesi disiplinor vazhdon.
Deri në njoftimin e mëtejshëm, Federata Spanjolle drejtohet nga nënkryetari Pedro Rocha, 68 vjeç. /tesheshi.com/
