Rreth 50 persona, të udhëhequr nga ish-muftiu Ibrahim Shabani dhe ish sekretari i Bashkësisë Islame të Maqedonisë Afrim Tahiri, kanë okupuar institucionin më të lartë fetar, ndërsa ish-myftiu ka shpallur veten kryetar, deri në normalizim të situatës brenda institucionit.
“Incidenti ka qenë i shoqëruar edhe me të shtëna armësh nga persona brenda Bashkësisë Islame”,- thonë dëshmitarët okularë.
Ngjarjes së sotme i ka paraprirë një tjetër incident, për të cilin Shabani dhe Tahiri akuzuan kryetarin Sulejman Rexhepi, se i ka sharë dhe ofenduar rëndë imamët në manifestimin Kur`anor të mbajtur ditë më parë, ndërsa një ditë më vonë Rexhepi i shkarkoi me procedurë të përshpejtuar.
“Sulejman Rexhepi nuk meriton të jetë kryetar i myslimanëve. Ne tani do të formojmë komisionin e punës i cili do të bëjë revizion të gjendjes financiare në BFI”,- deklaroi Shabani.
Zëdhënësi i BFI-së Agron Vojnika, në një bisedë telefonike na tha: “Për momentin ndjehen të kërcënuar dhe do të përmbahem nga secila deklaratë deri në qetësim të situatës”.
Mbetet dilemë se ku gjendet kryetari i BFI-së, Sulejman Rexhepi, i cili nuk u shfaq fare, ndërkohë që përkrahësit e tij nuk pranojnë autoritetin e kryetarit të vetëshpallur, pasi siç thonë, nuk është konform kushtetutës së institucionit fetar.
Nga ana tjetër, kryetari i tanishëm Sulejman Rexhepi bashkë me përkrahësit e tij, ndryshuan rregulloren e brendshme, sipas së cilës ai ka mandat të përjetshëm./tesheshi.com/
