Kompania mëmë e Google, Alphabet, tha se do të shkurtonte 12,000 vende pune, duke u thënë punëtorëve se situata ekonomike ishte më e keqe nga sa prisnin.
Kompania ka punësuar intensivisht vitet e fundit “për një realitet ekonomik ndryshe nga ai me të cilin po përballemi sot”, ka shkruar Sundar Pichai, CEO i Alphabet në një memo për punonjësit.
“Unë jam plotësisht përgjegjës për vendimet që na kanë sjellë në situatën aktuale”, shtoi Pichai.
Kompania po planifikon gjithashtu pushime nga puna në departamentet e inxhinierisë dhe punëtorët në SHBA ishin të parët që morën njoftimin trishtues.
Në vendet e tjera, procesi do të zgjasë më shumë për shkak të ligjeve të punës, shtuan ata.
Njoftimi i Google pasoi njoftimin e Microsoft këtë javë se planifikon të pushojë nga puna 10,000 punëtorë.
Konsumatorët po përpiqen të “optimizojnë” shpenzimet dixhitale dhe janë të kujdesshëm sepse disa pjesë të botës janë në recesion dhe të tjerat e presin atë, shpjegoi CEO i Microsoft, Satya Nadella në një mesazh për punonjësit, duke njoftuar një zhvendosje në “fusha strategjike”, duke përfshirë, ndoshta, inteligjence artificiale.
Amazon gjithashtu filloi të lajmërojë pushime nga puna të mërkurën, të cilat duhet të prekin 18,000 punonjës. Meta, kompania ombrellë e Facebook, planifikon të pushojë nga puna 11,000 prej tyre dhe Salesforce 10 për qind të totalit prej 80,000 punonjësish.
Në total, më shumë se 97,000 pushime nga puna priten në sektorin e teknologjisë në vitin 2022, më së shumti që nga viti 2002 kur u pushuan131,000 punëtorë, sipas të dhënave nga Challenger, Grey & Christmas.
“Ne nuk e kemi parë këtë lloj aktiviteti që nga përplasja e dot com,” tha Andrew Challenger, zëvendëspresident i lartë i kompanisë, duke iu referuar plasjes së flluskës dixhitale në fillim të shekullit. /tesheshi.com/
