Një ditë më parë në media u publikua një letër që Drejtori i Përgjithshëm i Policisë së Shtetit, Haki Çako, i drejtonte ministrit të Brendshëm në detyrë, Dritan Demiraj, ku e informonte se radarët monitorues në det nuk punonin, ndaj dhe kishin dështuar disa operacione kundër transportit të drogës.
Radarët janë në kompetencën e Ministrisë së Mbrojtjes, e cila në një deklaratë të përbashkët me Drejtorinë e Kufirit dhe Emigracionit, një strukturë kjo nën varësinë e Haki Çakos, konfirmuan të kundërtën e saj që pretendon kreu i Policisë së Shtetit.
Në lidhje me këtë debat të krijuar rishtas ka reaguar edhe kryeministri Edi Rama, sipas të cilit kjo është një propogandë e turpshme dhe i ka sugjeruar mediave të gjejnë një tjetër film.
“Nuk diskutohet që jemi në një fazë përmbyllëse të kësaj beteje, që nuk diskutohet që e kemi fituar. Nga ana tjetër bëhet gjithandej përpjekje për ta shpërndarë gjithë andej këtë lloj propagande, një lloj përpjekje e turpshme. Jemi në kushtet që edhe partnerët e konfirmojnë se territori është tërësisht i pastruar nga kjo mortje.
E kam fjalën për kanabisin. Këto që ndodhin në pikëpamjet e transportit dhe luftës që zhvillohet për penguar trafikuesit është interesi që do zhvillohet për një kohë të shkurtër dhe më pas nuk do përbëjë më asnjë lajm. Gjeni një tjetër film me se të merreni”, tha Rama. /tesheshi.com/
