Pas fitores së forcave pro-pavarësisë në zgjedhjet rajonale katalanase, njeriu simbol, Carles Puigdemont, i bëri thirrje qeverisë spanjolle që të lejojë kthimin e tij për të qenë prezent në hapjen e parlamentit katalanas, planifikuar për më 23 janar. Qëllimi, siç e ka bërë të qartë, është që të bëhet presidenti i ardhshëm i rajonit.
Prej javësh, Puigdemont ndodhet në kushte azili në Belgjikë, dhe në rast se kthehet atë e pret arrestimi me akuzën e organizimit të referendumit të pavarësisë në mënyrë të paligjshme.
“Dua të kthehem në Katalanjë sa më shpejt të jetë e mundur, do të doja të kthehesha tani dhe ky do të ishte një lajm i mirë për Spanjën”, tha Puigdemont në një intervistë për Reuters.
Ai më pas shtoi se në rast kthimi, do ishte anomani nëse nuk do lejohej të betohej si President.
“Unë jam presidenti i qeverisë rajonale dhe unë do të mbetem president nëse shteti spanjoll respekton rezultatet e votimit”, theksoi Puigdemont.
Lideri separatist ka shfaqur së fundi dhe dëshirën për dialog me qeverinë spanjolle, pra për një takim me kryeministrin Mariano Rajoy. /tesheshi.com/
