Ish-deputetja e Lëvizjes Vetëvendosje, Puhie Demaku, ka njoftuar se për arsye personale ka vendosur të tërhiqet përkohësisht nga angazhimet në politikë.
Në një postim në Facebook, ajo ka shkruar se gjashtë vjet me VV-në kanë qenë një rrugëtim me sfida dhe përvojë me vlerë.
“Pas zhvillimeve të fundit në skenën politike në vendin tonë, kam analizuar në hollësi angazhimin tim në jetën publike dhe dua të ju njoftoj se për arsye krejtësisht personale, do ta pauzoj angazhimin tim të drejtpërdrejtë në politikë”, ka shkruar Demaku.
Ajo ka folur për rrugëtimin me VV-në, derisa i ka uruar suksese në zgjedhje ish-subjektit të saj.
“Këto 6 vite në Lëvizjen Vetëvendosje kanë qenë një rrugëtim i jashtëzakonshëm, me sfida e mësime, por mbi të gjitha një përvojë më shumë vlerë. Duke marrë në konsideratë të gjithë faktorët e sidomos obligimet dhe përgjegjësitë personale, unë kam vendosur që të ndjekë një rrugë profesionale jashtë politikës, pa lënë anash kontributin, për aq sa mundem dhe di, për të mirën e kombit dhe avancimin e interesave të shtetit.
Lëvizjes, aktivistëve dhe kolegëve ju dëshiroj shumë sukses në zgjedhje dhe në sfidat që ju presin. Juve miq e familjarë u jam shumë mirënjohëse për mbështetjen, durimin e madje edhe për kritikat/vërejtjet/sygjerimet që m’i keni dhënë përgjatë këtij rrugëtimi. Uroj që rrugët tona të takohen për të mirë”, ka shkruar Demaku. /tesheshi.com/
