Policia e Shtetit ka publikuar shifrat mbi hyrje-daljet në territorin shqiptar përmes aeroportit të Rinasit, si dhe masat kundër terrorizmit.
Kështu referuar shifrave, në muajin gusht kanë hyrë në Shqipëri 308497 shtetas shqiptarë e të huaj, ndërsa kanë dalë 201332 të tillë.
Krahasuar me një vi tmë parë, ka pasur një rritje të fluksit të hyrjeve, ku numri arrin deri në 13500 shtetas shqiptarë dhe të huaj në ditë.
Aktualisht në Rinas po punohet me 7 sportele në hyrje dhe 5 në dalje.
Gjatë gjithë muajit Gusht nga shërbimet e Policisë Kufitare Rinas, janë arrestuar 9 shtetas, si dhe janë proceduar penalisht në gjendje të lirë 8 të tjerë, për veprën penale “Falsifikimi i pasaportave, letërnjoftimeve ose i vizave”.
Po kështu janë kapur 8 shtetas të shpallur në kërkim, për vepra të ndryshme penale, si dhe janë proçeduar penalisht për veprën penale të ”braktisjes së fëmijëve të mitur” 4 shtetas.
Në drejtim të evidentimit dhe bllokimit të shtetasve që kanë për qëllim kalimin e kufirit për të kërkuar azil në një nga vendet e BE-së, gjatë kësaj periudhe i është refuzuar dalja nga Republika e Shqipërisë 177 shtetasve .
Aktualisht janë forcuar edhe masat në drejtim të parandalimit të akteve terroriste.
Policia Kufitare e Rinasit është e angazhuar maksimalisht për t’u ofruar një shërbim sa më cilësor të gjithë shtetasve që hyjnë dhe dalin nëpërmjet aeroportit, si dhe e vendosur për të parandaluar, evidentuar dhe ndëshkuar paligjshmërinë. /tesheshi.com/
