Duke iu referuar disa të dhënave të marra nga burime të ndryshme statistikore, kanali prestigjoz Al Jazeera ka publikuar listën e pagave mesatare më të larta dhe më të ulëta në Europë, ku ndryshe nga ç’pritej Shqipëria nuk është renditur e fundit, meqë të dhënat përfshijnë dhe vende të Lindjes e sidomos Kaukazit. Por dhe në Ballkan, fundi i përket tjetër shteti.
Në bazë të të dhënave statistikore, pagat mesatare dukshëm dallojnë varësisht prej rajoneve të Evropës.
Prijnë Evropa perëndimore dhe Skandinavia, ku paga mesatare kalon pragun prej 2.000 euro.
Pagat më të larta janë në Lihtenshtejn, ku sipas raporteve mbi të ardhurat në vitin 2012, paga mesatare neto ka qenë 5.314 euro. Pasojnë Zvicra me 3.994 euro, Monako me 3.436 euro, Norvegjia me 3.212 euro dhe Luksemburgu me 3.149 euro.
Pagat më të ulëta janë në vendet e Evropës lindore. Në Ukrainë paga mesatare është 130 euro, pastaj në Azerbejxhan 224 euro, në Kazakistan 257 euro dhe në Bjellorusi 272 euro.
Sipas të dhënave të agjencisë për statistikë të vendeve të rajonit, pagën mesatare më të lartë në Ballkan e ka Sllovenia me 1.022 euro, pason Kroacia ku paga mesatare është 752 euro; ndërsa në Mal të Zi paga mesatare është 488 euro. Dhe tre vendet e fundit i përkasin Shqipërisë, Kosovës dhe Maqedonisë me renditjen si vijon, e ku çuditërisht pra Shqipëria nuk është e fundit, vend i cili i përket Maqedonisë. Kosova e ka 364 euro; Shqipëria 357 euro; dhe pas saj Maqedonia me 354 euro. /tesheshi.com/
