Presidentja Atifete Jahjaga plot me njësha e ka pasur të mbushur ditarin e Gjimnazit. Në kulmin e të arriturave të saj politike, tani më së paku ajo do të dëshironte ta shihte ditarin e Gjimnazit ‘Sami Frashëri’ në periudhën 1989-1990, ku suksesi i saj në shkollë, e sidomos në gjysmë vjetorin e parë, ishte shumë i dobët. Në disa lëndë ajo kishte përfunduar gjysmë vjetorin me disa nota të dobëta ‘njësha’, ndërsa në gjysmë vjetorin e dytë i kishte përmirësuar në të mjaftueshme.
Ky shkrim i publikuar sot nga portali kosovar, infokusi.com ka ngjallur debat të madh në medie online, sidomos në rrjete sociale.
Në këtë debat të hapur, tashmë janë përfshirë politikan, analistë e gazetar të cilët kanë shprehur qëndrimet e tyre për çështjen në fjalë.
Si rrallë herë deri me tash në mandatin e saj 5 vjeçarë, presidentja Jahjaga ka marrë përkrahje të madhe jo vetëm nga gazetar e shoqëria civile por edhe nga partitë opozitare.
Kryetari i Prishtinës, Shpend Ahmeti i cili i ka dalë në mbrojtje presidentes ka thënë se po të ishin notat shkollore kriter i pozitave në skenën politike sot shumë njerëz nuk do të ishin në këto pozita në krejt institucionet dhe Kosova do të mund të ishte ndryshe. Ai përmes një shkrimi në Facebook ka thënë se po të ishin notat shkollore kriter i dijes sot nuk do te kishim kaq shumë të padijshem me tituj e nota të mira.
“Është e qartë që në kohën kur Thaçit edhe nga qarqet ndërkombëtare po i bëhet me dije që nuk e ka përkrahjen për president, duhet të sulmohet kandidatja e bashkësisë ndërkombëtare (imazhi) dhe këtë me publikimin e ditarve të gjimnazit. Besoj që tash shumë njerëz po mendojnë për notat e tyre, por është ironike se si presidentja qe një kohë ka marr anën e atyre që sot e sulmojnë. Dikush mund të thotë se nuk ka pas rrugë tjetër për shkak të miqëve ndërkombëtar. Këtu qendron edhe problemi i zgjedhjes së saj në atë kohë. Fuqia e saj është derivuar nga faktori ndërkombëtar, e jo nga vullneti dhe kompromisi i të gjithëve. Tani bëhet cak edhe i sulmeve të atyre forcave që e zgjodhen. Pra, nuk ka qenë problem personaliteti i saj por mënyra e zgjedhjes.
Notat e presidentes janë problemi më i vogël i demokracisë tonë të brishtë e të thyer”, ka deklaruar Ahmeti.
Drejtoresha e Koha Grup, Flaka Surroi ka thënë se shumë më shumë shqetësuese është fakti se Kosova është e vërshuar nga profesorë-doktorë me punime shkencore të vjedhura.
“Nuk e di pse është problem nëse s’i ke pas krejt pesëshe në fillore e të mesme, e krejt dhjetëshe ne fakultet. Kjo punë s’ka të bëjë vetëm me inteligjencën, sepse notat përherë janë vlerësim subjektiv i profesorit, posaçërisht aty ku pyetesh me gojë. Dhe fakti që dikush e ka pasë 1-sh a 2-sh në kimi nuk do të thotë se është ngelaq, po thjeshtë s’ka afinitet për atë lëndë. A të gjithë ne i kemi merituar 5-t në art figurativ, a në edukatë fizike, për shembull? Jo, natyrisht, sepse nuk kanë qenë lëndë që na “flejnë”…”, ka thënë Flaka Surroi e cila më pas ka shtuar.
“Unë jam shumë më tepër e brengosur për nga fakti se Kosova është vërshuar nga profesor-doktorat me punime shkencore të vjedhura, e të rreme, e të pacilësi që të vetmen gjë që mund t’ua mësojnë studentëve, e besa edhe popullit, është që të bëhen si ata — pra hajna dhe mashtrues. E qasi, me tonelata i ke në Qeveri e Kuvend — por s’pashë që dikush ua qiti indeksat në syret, as nuk i pyeti se si i përfunduan studimet pa shku fare neper provime…”, ka shtuar Surroi.
Analisti, Arben Qirezi thotë se transkriptet e notave, duke i përfshirë edhe të dhënat në ditar shkollor janë informacione konfidenciale.
“Edhe institicionet ku duhet të dorezohen notat, këto informacione duhet t’i trajtojnë në mënyrë konfidenciale. Personat që kane zbuluar dhe i janë bërë të qasshme të dhena mbi suuksesin shkollor të Presidentes pa pëlqimin e saj, kanë bërë shkelje të ligjit dhe ia kanë shkelur të drejtat e saj të njeriut. Ky ‘zbulim’ është shqetësues!”, ka shkruar Qirezi në Facebook.
Adritaik Kelmendi, gazetar duke komentuar zërat pro dhe kundër Jahjagës ka shtruar pyetjet pse ‘shkollovanat’ po lejojnë që ‘ngelcanat’ ta udhëheqin shtetin.
“Njëra palë: Shih çfarë Presidente ngelcejkë po na udhëheqë. Marre!
Tjetra palë: Kollaj e keni me Presidenten e papërkrahje, pse nuk po ia publikoni n’guxovshi njëshat Thaçit, Limajt, Haradinajt, Veselit e shumë të tjerëve?… Marre!
Vetëm një “detaj” po harrohet:
Pse ne “shkollovanat” po lejojmë që këta “ngelcana” të na udhëheqin se?! S’di cila qenka më marre!”, ka shkruar Kelmendi në Facebook.
Zëdhënësi i AAK-së Muharrem Nitaj, thotë se mediat e bëjnë punën e tyre, por në raste të tilla duhet të ketë një kërkesë për qasje në dikumentat zyrtare, dhe një leje për këtë.
“Kush qëndron prapa “nishave” të Presidentes.
A pati një kërkesë për qasje në dokumentin zyrtar (ditarin e notave) të Presidentes? Nëse po, kush e bëri dhe kush e dha lejen?
Nëse jo, kush e nxorri ditarin jasht, me çfarë qëllimi dhe me urdhër të kujt!?
A ka drejtor ajo shkollë dhe kush është ai dhe pse nuk po flet?
Mediat e bëjnë punën e tyre, (hallall u qoftë) por në raste të tilla duhet të ketë një kërkesë për qasje në dikumentat zyrtare, dhe një leje pêr këtë.
Nëse nuk është respektur kjo procedurë, ose edhe më keq nsese kjo është pjesë e një lufte politike, drejtori i “shkollës së Presidentes, duhet të ikë nga detyra!”, ka shkruar Nitaj në Facebook.
Edhe drejtori i Institutit GAP, Agron Demi përmes një postimi në Facebook i ka dalë në mbrojtje të parës së shtetit.
“Kjo histeria pas ditarit të shkollës së mesme të Presidentes e tregon vetëm një gjë: në këtë vend, nëse qeveris ndershëm dhe nuk je i lidhur me të fortit e krimit, ty të bahen publike prej librezës së notave e deri tek vaksinimi që e ke mar.Kurse për politikanët e korruptuar e të lidhur me krimin, jo që nuk mundesh me jau gjet diplomat e fakultetit, po nuk jau gjen as kontratat miliardëshe për autostrada apo asnjë gjurmë të shërbimeve sekrete ilegale e kriminale.Ky nuk është vend për të dobëtin”, ka shkruar Demi.
Përgatiti: Blendi Gashi – /tesheshi.com/
