Shqipëria, atje ku e kërkonte Koço Kokëdhima: drejt legalizimit të kanabisit për arsye mjekësore. Eshtë bërë e ditur kja nga vetë kryeministri Rama në një konferencë për shtyp me ambasadorim Soreca, në kuadër të Ditës së Europës.
Sipas Ramës, Shqipëria do ndjekë modelin maqedonas e jo vetëm, e drafti i legalizimit do jetë gati shumë shpejt për diskutim publik, kjo pasi është shqyrtuar me ekspertë të huaj.
“Kemi një vit që punojmë, edhe pak edhe do të jetë gati. Asnjëherë nuk bëjmë punë pa u konsultuar me ekspertë vendas dhe të huaj. Jemi konsultuar me ekspertë të huaj, por gjëja kryesore që ne bëjmë dhe që na ka dalë ndihmë e madhe është konsultimi me të tjerët.
Nuk kemi ardhur të shpikim, por të mësojmë nga të tjerët. Shumë shpejt drafti do të jetë gati për diskutim publik, ashtu si ai për amnistinë fiskale, që është gati po diskutohet me disa institucione ndërkombëtare“, tha Rama.
Kujtojmë se në valën e mbylljes së Lazaratit, hambari i kanabisit në Shqipëri për më shumë se 20 vite, ishte Koço Kokëdhima, atëherë deputetet i PS-së dhe ndër më të afërtit me Ramën, i cili mbrojti fort idenë e legalizimit të kanabisit për arsye mjekësore.
Rama iu përgjigj duke thënë se ishte ende herët për ta shqyrtuar këtë tezë, ndërkohë që ish-ministri Tahiri e sulmonte ashpër Kokëdhimën për idenë e tij. /tesheshi.com/
