Dita e fundit e javës mbyllej me tre sfida kyçe në tre prej kampionateve më të mira të Europës. Tre përballje që nuk kanë zhgënjyer aspak për atë që kanë dhënë.
Kampionët e Francës, në telashe përgjatë një pjese të parë të sezonit për shkak të gjithë atyre ndryshimeve të bëra gjatë verës, tani e kanë përshpejtuar në mënyrë fantastike ritmin.
Dhe pasi viktimë e PSG-së ra fillimisht Barcelona, radha ka qenë mbrëmë për një kundërshtar tradicional në kampionatin francez.
Asgjë nuk e ka ndaluar PSG-në të arrijë një fitore të madhe në “Velodrome” ndaj Olimpikut të Marsejës, e për më tepër me plot pesë gola.
Fitorja 1-5 është kuptimplote, tregues i forcës së një skuadre që luan vërtet futboll të këndshëm.
Në Serinë A, është Roma që nuk tutet para Interit në “Giuseppe Meazza”. Fiton 1-3 dhe është po aty, pas Juventusit, në ndjekje të kryesuesve.
Nainggolan realizoi dy gola të shkëlqyer, njëri më i bukur se tjetri; të dy me goditje të fuqishme, të dy të pamundur për t’u shmangur nga Handanovic.
Më në tatëpjetë qe fitorja e Realit të Madridit në La Liga. Më pisk e patën madrilenët ndaj Vilarealit që i priste në fushën e tij.
Pikërisht kur u duk se Barcelona do të mund ta mbante kryesimin e kampionatit, Reali i Madridit e ktheu ndeshjen në “Estadio de la Ceramica” nga 2-0 për vendasit në 2-3 për të.
Golat nga Trigueros dhe Bakambu në pjesën e dytë morën si përgjigje pak minuta më vonë tundjet e rrjetës nga Bale, Ronaldo dhe Morata.
Rezultati fitues e ripozicionoi Realin në vend të parë, edhe pse me kundërshtarët mjaft pranë. /tesheshi.com/
