E kualifikuara e parë e së mërkurës në çerekfinalet e Champions League-s qe skuadra portugeze e Benfikës. Ajo i mohoi Zenitit mundësinë për të arritur për herë të parë në këtë fazë të aktivitetit.
Vetë Benfika arriti në çerekfinale pas shumë vitesh, që nga sezoni 2011-2012, kur do të eliminohej më pas nga Çelsi.
Ekipi portugez i zgjidhi të dy ndeshjet eliminatore në momentet e fundit. Ashtu siç kishte bërë në
takimin e parë në Lisbonë, ku pati fituar ndaj rusëve 1-0 me një gol të shënuar në cakun kohor të lojës, ashtu do të bënte dhe mbrëmë.
Pas një pjese të parë për t’u harruar, Hulk u dha zemër vendasve të Zenitit kur shënoi në minutën e 69-të. Goli i dytë do t’i kishte kualifikuar rusët, por nuk u arrit të shënohej. Krejt ndryshe nga sa pritej, golin e gjejnë portugezët, që realizojnë dy herë në minutën e 85-të dhe të 96-të, me golashënues Gaitan-in dhe Talisca-n.
Rezultati 1-2 do të thotë se Benfika do të luajë në çerekfinale, e Zeniti do duhet të presë një mundësi tjetër në vitet në vijim.
Tepër tërheqëse ka qenë përballja në Londër mes Çelsit dhe PSG-së. Pozitat e ndryshme në kampionatet përkatëse nuk qenë fare të spikatshme, aq sa në momente të caktuara Çelsi qe mjaft spektakolar në lojën e tij, në një stil të pandeshur më parë.
Francezët e PSG-së përsëritën rezultatin e takimit të parë, kur patën fituar 2-1. Po kaq, 1-2 përfundoi dhe ky takim për ta, por atyre iu desh të kalonin momente të ndërlikuara gjatë lojës.
Fillimisht do të shënonte Rabiot për PSG-në, duke u dhënë miqve avantazhin e dëshiruar. Diego Costa, i ringjallur tërësisht, qe një problem i vazhdueshëm për mbrojtjen mike. E pikërisht ai shënoi në minutën e 27-të, duke barazuar shifrat.
Çelsi u shfaq mjaft kërkues në këtë pjesë të lojës. Qarkullimi për t’u admiruar i topit dhe rreziku i përhershëm që krijonte Diego Costa në zonën kundërshtare i përshkuan minutat e mesit të lojës. Pikat e kthesës qenë në nisjen e gjysmëorëshit të fundit të takimit. Diego Costa largohet i dëmtuar në minutën e 60-të, çka ua pret hovin vendasve, e Ibrahimoviç shënon shtatë minuta më pas, duke i dhënë fund ekuacionit.
Çelsi pranon eliminimin, e PSG-ja vijon me shpresën se mund ta fitojë këtë vit Champions League-n. /tesheshi.com/
