Paris Sent-Zhërmeni ka mposhtur Çelsin në ndeshjen e parë të fazës eliminatore të Ligës së Kampionëve. Francezët e kanë dominuar në përgjithësi lojën, por nuk kanë mundur të bëjnë më shumë ndaj anglezëve të vendosur jashtëzakonisht mirë. Takimi i mbyllur 2-1 flet për epërsinë e vendasve, që mund të kishin arritur dhe një fitore më të thellë nëse rastet e shumta do ishin kthyer në gol. Përkundër kësaj, miqtë u treguan cinikë, dhe ia dolën ta gjenin atë që kërkonin, golin që i mban ende në lojë.
Në fakt, londinezët e patën mundësinë e parë për të realizuar, mirëpo goditjen fantastike me kokë të sulmuesit spanjoll Diego Costa e priti me mjaft mund gardiani vendas, Kevin Trapp. Ndërkohë, në anën tjetër të fushës, Courtois nuk mundi t’i rezistonte një tjetër goditjeje të Ibrahimovic-it, të cilin e ndihmon paksa edhe Obi Mikel, për t’i zhbllokuar shifrat në të mirë të parizienëve.
Ishte vetë mesfushori Obi Mikel që u përkujdes ta ndreqte gabimin e tij, duke realizuar në fundin e pjesës së parë, pas një rivënie nga këndi, dhe duke i barazuar shifrat, në 1-1.
Tabloja qe e njëjtë në pjesën e dytë të lojës: PSG-ja sulmonte dhe Çelsi mbrohej. Mirëpo “muri” i londinezëve u thye pas një aksioni model të Di Maria-s dhe Cavani-t, me sulmuesin uruguajan që godet fort pjerrtas në minutën e 78-të, duke mposhtur portierin dhe duke i rikaluar vendasit në avantazh.
Në minutat e fundit të ndeshjes, futbollistët e Çelsit u munduan t’i zënë sërish në befasi vendasit, veçse goditjet e tyre nuk mundën ta ndryshojnë historinë e ndeshjes.
Fitorja 2-1 e PSG-së e lë të hapur kualifikimin për të dyja skuadrat, duke paralajmëruar kështu një betejë të vërtetë në ndeshjen e kthimit.
Në takimin tjetër të mbrëmjes së djeshme, Benfika do ta gjente golin e fitores ndaj rusëve të Zenitit vetëm në minutën e 91-të. Goli i Jonas-it qe vendimtar për portugezët.
Epërsia e Benfikës qe e dukshme në fushë, por nuk u konkretizua siç duhej. Rezultati do të ndryshonte në fundin e ndeshjes, dhe fitorja 1-0 e vendasve u jep atyre njëfarë qetësie për takimin e dytë. /tesheshi.com/
