Një ushtare e re në Artilerinë Mbretërore të Britanisë u vetëvra pasi u ngacmua seksualisht nga një epror, sipas përfundimit të një hetimi të brendshëm të publikuar sot nga mediat britanike.
Sipas raportit të lëshuar nga ushtria, Jaisley Beck ka marrë mbi 1000 mesazhe me tekst dhe audio nga eprori i saj në tetor 2021. Në nëntor, numri i mesazheve tani i ka kaluar 3500.
“Është pothuajse e sigurt se ky ishte një faktor kontribues në vdekjen e saj,” thotë raporti për vetëvrasjen e 19-vjeçares, e cila u gjet e vdekur në kampin Larkhill në Wiltshire në dhjetor 2021. Vetëm disa javë para se t’i jepte fund jetës së saj, ajo i kishte dërguar një mesazh eprorit duke i thënë se nuk mund të përballonte më sjelljen e tij, e cila ndikoi në psikikën e saj.
Duke folur për BBC, nëna e Beck-ut, Leanne McCready, tha për vuajtjen e së bijës: “Ju mund të mendoni se mënyra më e lehtë do të ishte ta bllokoni atë, por nuk mund ta bllokoni thjesht shefin tuaj… Ishte vazhdimisht e dëshpëruar. Ishte sjellje që e bëri të vuante edhe pse e donte punën e saj”.
Sipas saj, vajza e saj hezitonte të denonconte burrin për shkak të mënyrës se si u trajtua një ankesë e mëparshme për sulm seksual.
Siç thekson raporti, vetëvrasja e Beck-ut pas “një periudhe intensive të sjelljes së padëshiruar” i “befasoi” eprorët e saj. Dokumenti thekson gjithashtu se ka pasur faktorë të tjerë që mund të kenë kontribuuar në vdekjen e vajzës, duke përfshirë dy marrëdhënie, një “marrëdhënie jo të shëndetshme me alkoolin” dhe probleme familjare që përfshinin humbjen e një njeriu të dashur.
Nëna e 19-vjeçares shprehu mospajtimin e saj me pretendimin e mësipërm, duke thënë se ata po mundohen të hedhin shumë fajin mbi familjen.
Në korrik 2021, Jaisley Beck u sulmua seksualisht nga një roje sigurie në një ngjarje sociale. Pas incidentit, Beck u fsheh në banjë, më pas e kaloi pjesën tjetër të mbrëmjes në makinën e saj, sipas denoncimit të bërë nga kolegu i saj.
Sipas Qendrës për Drejtësi Ushtarake (CMJ), e cila përfaqëson familjen e 19-vjeçares, megjithëse ngjarja u raportua në ushtri, policia nuk u informua dhe nuk u krye “ndonjë hetim thelbësor”. Në raportin e ushtrisë për incidentin thuhet se “ka dëshmi se nuk është ndjekur procedura e duhur e raportimit”.
Në një letër duke i kërkuar falje Beck-ut pas incidentit, sulmuesi i shkruante vajzës se “dera e tij do të jetë gjithmonë e hapur për të”. Në raportin e ushtrisë theksohet se përvoja e mësipërme mund të ketë rezultuar që vajza të humbasë besimin e saj ndaj administratës dhe si rrjedhojë ajo ka frikë të denoncojë sjellje të tjera të papërshtatshme.
Avokatja e familjes së Beck tha se e vetmja gjë e mirë për këtë rast të tmerrshëm është se ushtria mori të paktën një pjesë të përgjegjësisë përmes këtij raporti, gjë që ajo nuk mendon se do të kishte ndodhur disa vite më parë. /tesheshi.com/
