Kancelari gjerman Olaf Scholz sot, duke iu përgjigjur kritikave të presidentit rus Vladimir Putin, i cili tha se NATO kishte filluar një luftë në Evropë kundër Jugosllavisë, tha se Aleanca e kishte bërë këtë për të parandaluar gjenocidin në Kosovë, raportoi Reuters.
Duke folur në një konferencë të përbashkët shtypi pas bisedimeve me Scholz, Putin tha se ai kishte ende kujtime të freskëta nga lufta e Aleancës së Atlantikut të Veriut kundër Jugosllavisë dhe bombardimeve të Beogradit.
“Sa i përket luftës në Evropë, kancelari gjerman sapo tha se njerëzit e brezit të tij, dhe unë i përkas atyre, vështirë se mund të imagjinojnë ndonjë luftë në Evropë. Kjo i referohet situatës rreth Ukrainës. Por ne kemi qenë dëshmitarë të luftës në Evropë që blloku i NATO-s filloi kundër Jugosllavisë. Ishte një operacion i madh ushtarak me bombardimin e një prej kryeqyteteve evropiane, Beogradit. Ndodhi pa lejen e Këshillit të Sigurimit të OKB-së. Ky është një shembull shumë i keq, por ishte”, tha Putin.
Siguria afatgjatë në Evropë, vetëm me Rusinë
Duke iu drejtuar shtypit, Scholz tha se biseda me presidentin rus ishte e sinqertë.
Duke folur për sigurinë në Evropë, kancelari gjermane theksoi se siguria afatgjatë në Evropë mund të arrihet vetëm me Rusinë.
“Për brezin tim, lufta në Evropë është e paimagjinueshme. Ne duhet të sigurojmë që ajo të mbetet kështu,” tha ai, duke shtuar se “është përgjegjësia jonë si udhëheqës shtetërorë dhe qeveritarë të parandalojmë përshkallëzimin ushtarak në Evropë”.
Për muaj të tërë, ka pasur shqetësime në rritje se Rusia – e cila ka grumbulluar forca në kufirin e Ukrainës – po tenton pushtimin e kësaj ish-republike sovjetikt. Forcat e mbështetura nga Rusia tashmë kontrollojnë pjesë të Ukrainës lindore, ndërsa Rusia aneksoi gadishullin ukrainas të Krimesë në vitin 2014.
Rusia mohon planet për të pushtuar. Megjithatë, ajo përdori fokusin në zonë për të shprehur frikën se NATO kishte hyrë shumë afër territorit të saj dhe kërkoi që aleanca ushtarake të tërhiqej nga ajo që Rusia e sheh si sferën e saj të ndikimit, një anëtare e NATO-s. /tesheshi.com/
