Si një reagim ndaj sulmit kimik të regjimit sirian në Han Shejhun, në provincën e Idlibit, në fillim të kësaj jave, nga dy luftanije amerikane në Mesdhe u lëshuan në orët e para të së premtes dhjetëra raketa mbi bazën ajrore siriane të Shajratit.
Po pse pikërisht mbi këtë bazë?
Ja ç’shpjegim jep Al Arabiya. Sipas korrespondentit të saj në Uashington, amerikanët besojnë se sulmi kimik që shkaktoi më shumë se 100 viktima e 400 të plagosur në Han Shejhun e pati zanafillën nga kjo bazë ushtarake e regjimit sirian.
Baza ajrore e Shajratit, thotë Al Arabiya duke iu referuar raportimeve siriane, është një prej më të rëndësishmeve të ushtrisë siriane. E gjendur 30 kilometra në juglindje të Homsit, prej saj mendohet se nisen avionët që godasin pikërisht Homsin, Idlibin dhe Hamanë.
Në këtë bazë ajrore ka avionë MiG 23, MiG25 dhe Sukhoi Su 25, si dhe raketa kundërajrore SM-6, radarë e sisteme të mbrojtjes ajrore.
Një aktivist i medias në kufirin mes Sirisë dhe Turqisë, Ibrahim al-Idlibi, ka thënë në një intervistë për Al Arabiya-n se kjo bazë ajrore ka qenë së fundi një qendër pune për një numër të madh konsulentësh iranianë, shumë prej të cilëve kanë vdekur këtë të premte.
“Kjo bazë ajrore është forca kryesore mbështetëse ajrore e trupave ushtarake siriane,” i ka deklaruar AFP-së kryeqeverisësi i Homsit, një besnik i regjimit sirian.
Ndërkohë që një analist ushtarak, Asaad Awad al-Zohbi, i sheh këto sulme si një mesazh të fortë për botën, duke treguar për një qasje politike krejt të ndryshme të Trump-it nga ajo e paraardhësit të tij. /tesheshi.com/
