Nga Blendi Gashi
Fatmir Limaj, i njohur në luftë si “Komandant Çeliku”, është një nga politikanët me të cilin drejtësia është marrë më së shumti nga përfundimi i luftës dhe vazhdon të merret me të, pasi janë ngritur disa aktakuza ndaj tij për raste të ndryshme.
Kreu i partisë NISMA për Kosovën, vetëm tri vite pas çlirimit të vendit mund të thuhet se jetoi i qetë dhe më pas nisi ofensiva me aktakuza të njëpasnjëshme ndaj tij.
E para u ngrit në vitin 2003 nga Tribunali i Hagës për krime lufte, por në nëntor të vitit 2005 u shpall i pafajshëm.
Aktakuza e dytë ndaj Limajt u ngrit në nëntor të vitit 2011 për rastin e quajtur “Kleçka”, ku Limaj u shpall sërish i pafajshëm në maj të 2012-tës.
Përkundër kësaj, rasti në fjalë u rikthye në rigjykim edhe dy herë të tjera: së pari më 25 nëntor 2012, por që më pas më 17 shtator 2013 e shpalli për herë të dytë të pafajshëm.
“Kleçka” për herë të tretë në rigjykim u rikthye më 20 gusht 2015, kurse më 15 maj 2016 Limaj përfundimisht u shpall i pafajshëm nga Gjykata e Apelit me vendim të formës së prerë.
Një aktakuzë tjetër, e treta me radhë, e ngritur ndaj Limajt është ajo e njohur si rasti “MTPT 1”.
Pas bastisejeve të famshme që ndodhën në Ministrinë e Transportit dhe Postë Telekomunikacionit (MTPT) në vitin 2010, ministri kjo që udhëhiqej nga Limaj, pas dy viteve më 16 nëntor 2012 u ngrit aktakuzë ndaj tij.
Po ashtu, më 27 shkurt 2014 u ngrit një aktakuzë e re për Limajn sërish për MTPT-në, por tashmë për rastin e quajtur “MTPT 2”. Ky rast vazhdon ende…
Por, këtu nuk përfundojnë aktakuzat ndaj kreut të NISMA-s.
Së fundmi, Prokuroria Speciale e Kosovës siç dihet ka ngritur një aktakuzë të re ndaj Fatmir Limajt për krime lufte, ku saktësisht aktakuza ka të bëjë me vrasjen e dy civilëve: Ramiz Hoxha nga fshati Bellanicë dhe Selman Binishi nga fshati Banjë, komuna e Malishevës.
Por ngritja e kësaj aktakuze të re ka nervozuar jo pak Limajn, për faktin se thotë se për rastin në fjalë së paku tre herë është hetuar, dy herë nga UNMIK-u dhe një herë nga Tribunali i Hagës, ku në të tri rastet për mungesë të provave hetimet kundër tij janë mbyllur dhe kjo dëshmohet edhe nga shkresat hetimore të lëndës të cilat thotë se i ka marrë nga prokuroria.
Limaj, ka një shpjegim pse drejtësia po merret me të, dhe pse po ngriten aktakuza ndaj tij për rastet që është shpallur i pafajshëm.
“Për drejtësi e kam kryer. Tash është koha e përndjekjeve”
Ish-“Komandant Çeliku”, thotë se aktakuza më e re e ngritur ndaj tij për krime lufte përbën vetëm përndjekje të tij.
“Për drejtësi e kam kryer. Tash është koha e përndjekjeve. Le të vazhdojnë përndjekjet”, ka thënë Limaj, së fundmi në një intervistë dhënë për televizionin publik të Kosovës.
Limaj, ka lënë mesazh të qartë se do të punojë për të demaskuar personat dhe grupet që po përdorin institucionin për të shkatërruar persona të caktuar dhe se krejt angazhimin e tij do ta jap “të kthehet shteti ligjor”.
Se kreu i tyre, Fatmir Limaj, po përgjigjet njëzëri thonë edhe të gjithë bashkëpartiakët e tij, për çka thonë se nuk kanë asnjë dyshim dhe nuk duhet asnjë argument tjetër, se Limaj është duke u përndjekur po aq sa është duke u përndjekur Ushtria Çlirimtare e Kosovës, si vlerë kombëtare.
“Përndjekja e Limaj nga armiqtë e sehergjinjtë, nga ata që bënin dosje e sot heshtin si mumie”
Ndonëse kreu i NISMA-s refuzoi të tregojë se nga kush po përndiqet, bashkëpartiaku i tij Jakup Krasniqi përmes një shkrimi në Facebook thotë se; “Përndjekja e tij (Limajt), nuk bëhet nga qytetarët e Kosovës, nuk bëhet nga njerëzit që e donin dhe e donë lirinë e shtetin e Kosovës, nga ata që e njihnin dhe e njohin vlerën e luftës çlirimtare, që i donin dhe i donë qytetarët e Kosovës dhe te ardhmen e tyre te lirë e të dinjitetshme, por nga armiqtë e sehergjinjtë, te cilët shtetit e se drejtës, shtetin e zhvilluar, shtetin e drejtësisë sociale, prisnin t’ua sillte dikush në pjatë. Ata që dje përgatiten dosje e sot heshtin si mumie apo shpifin pa fije turpi kudo qe u epet rasti!”
Është vërtetë e çuditshme se si aktakuza e re ndaj Limajt u ngrit një ditë pasi ai fuqishëm ngriti zërin kundër dënimit të grupit “Drenica”, dhe kritikave të ashpra që dha për sistemin e drejtësisë.
Andaj pashmangshëm shtrohen pyetjet:
Pse drejtësia ia ka vënë syrin vetëm Limajt dhe nuk lë vit pothuajse pa shkuar pa ngritur një aktakuzë ndaj tij?
Pse kjo aktakuzë e re vetëm një ditë pas debatit të ashpër që ndodhi për “Drenicën” në Kuvend?
Pse aktakuza një ditë pasi Limaj propozoi që mos të lejohen të punojnë gjyqtarët dhe prokurorët e viteve të 90-ta?
Duke parë të gjitha aktakuzat e ngritura ndaj tij, shpalljen i pafajshëm edhe nga drejtësia ndërkombëtare, pra në Hagë, është kjo një (ç)drejtësi apo përndjekje ndaj Limajt? /tesheshi.com/
