Departamenti i Drejtësisë së Shteteve të Bashkuara të Amerikës, ka caktuar një prokuror Federal, për t`iu bashkuar trupës së 5 prokurorëve shqiptare dhe 6 nga vendeve të Bashkimit Europian, për të nisur operacionin e madh të arrestimeve dhe pastrimit të politikës dhe administratës shqiptare nga krimi dhe korrupsioni.
Një parlamentar shqiptar, i tha tesheshi.com, se bëhet fjalë për një mision krejtësisht i paparë më parë, ndaj dhe fraza e kryeministrit Rama se do të ketë rezultate që “nuk ia rrok mendja njeriut”, vjen vetëm si mbështetje në këtë synim.
Siç mësohet, ky mision i paparë ndonjëherë në Shqipëri do të funksionojë në dy degëzime dhe detyra të ndara mes grupit special antikorrupsion.
Ndërsa 6 prokurorët e Bashkimit Europian do të merren pikërisht me çështjet e tenderave dhe rryshfeteve, prokurori i emëruar nga qeveria e presidentit Barack Obama do të hetojë pjesën e lidhjes së politikës shqiptare me trafikun e drogës, armëve dhe pastrimin e parave.
Ka qenë vetë ambasadori i Shteteve të Bashkuara të Amerikës në Tiranë, Donald Lu, i cili ka bërë publike emërimin e një zyrtari shumë të rëndësishëm amerikan në operacionin e pritshëm “spastrimi i politikës”.
“SHBA mbështet luftën kundër krimit të organizuar dhe korrupsionit. Sapo kemi caktuar një prokuror federal që të punojë me njësinë e antikorrupsionit në Prokurorinë për Krimet e Rënda”, tha ambasadori amerikan Donald Lu, në takimin mbi luftën ndaj narkotikëve.
Në fakt, deklarata e ambasadorit të SHBA-së kishte edhe një shtesë të rëndësishme, që prokurori amerikan do të ribëjë edhe ligjin mbi Byronë Kombëtare të Hetimit, draft që u rrëzua nga Gjykata Kushtetuese si pasojë e një lobimi invaziv të opozitës dhe LSI-së.
Dhe siç mësohet, një takim i bërë sot mes ambasadorit amerikan dhe liderit të opozitës Lulzim Basha, ka pasur si objekt pikërisht mbështetjen nga ana e PD-së së draftit të Byrosë së Hetimit. Drafti që do të miratohet në Kuvend së bashku me të ashtuquajturën reformë në Drejtësi, që është një grup projektligjesh që ndryshojnë përbërjen e funksionet e Këshillit të Lartë të Drejtësisë, Prokurorisë, pritet të amendojë dhe ligjin themeltar të shtetit, Kushtetutën e Republikës.
Droga
Por në fakt roli më specifik i prokurorit amerikan në grupin e prokurorëve, do të jetë pikërisht implikimi i deputetëve e zyrtarëve të lartë shqiptarë në trafikun ndërkombëtar të drogës.
Dhe për këtë aspekt, DEA amerikane ka një panoramë shumë të qartë për implikimin e politikanëve shqiptarë në trafikun e heroinës në radhë të parë, kokainës në radhë të dytë dhe më pas të kanabisit.
Siç mësohet, një ish-zyrtar shqiptar ka folur, duke u bërë bashkëpunëtor i Departamentit Amerikan të Drejtësisë në një megaproces në SHBA, mbi një bandë të rëndësishme të trafikut të heroines, ku ish-zyrtar ka përmendur implikimin e disa njerëzve brenda politikës shqiptare në një nivel të lartë, në blerjen, tranzitin, shitjen dhe shpërndarjen e drogës në rrjet ndërkombëtar. Dhe në këtë rrjet janë të përfshirë aktorë shumë të rëndësishëm, ndaj Rama përdori shprehjen: “nuk ia rrok askujt mendja”.
Duhet veçuar kjo e dhënë që, SHBA ka gjithsej 93 prokurorë federalë; një nga këto është emëruar në Shqipëri. /tesheshi.com/
