Kryeministri Rama duket se nuk po gjen karar me kryebashkiakët e zgjedhur për të qeverisur Vlorën, “pikën e tij të dobët” ndër qytete, e lidhur me fëmijërinë e tij si nip aty. Pasi u “divorcua” nga Dritan Leli në gysmën e mandatit të këtij të fundit, pa e marrë fare më në konsideratë, tashmë duket se dhe me Ermal Dredhën po shfaqet i zhgënjyer.
Rama ka zhvilluar mëngjesin e së enjtes një takim urgjent në ambientet e Bashkisë së Vlorës, i karakterizuar nga tone të ashpra dhe kërkesa të drejtpërdrejta nga ana e kryeministrit. Sipas burimeve nga mbledhja, Rama ka kërkuar shkarkimin e menjëhershëm të të gjithë drejtorëve të Bashkisë së Vlorës.
“Që nga ky moment, të gjithë jeni të shkarkuar. Kryetari i Bashkisë duhet të firmosë menjëherë shkarkimet”, mësohet të ketë deklaruar Rama.
Gjithashtu, ai ka theksuar se të gjithë drejtuesit vendorë duhet të jenë në gatishmëri të plotë për të zgjidhur problemet e qytetarëve dhe për të adresuar me urgjencë çështjet që shqetësojnë qytetin.
Ky reagim i fortë i kryeministrit vjen në një kohë kur Vlora përballet me një sërë problematikash të pazgjidhura nga strukturat përkatëse, ndërsa pakënaqësitë qytetare për mënyrën e funksionimit të administratës vendore janë shtuar ndjeshëm, raporton TCH.
Ende nuk dihet se kush do të jenë zëvendësuesit e drejtorëve aktualë, por në ditët në vijim priten zhvillime dhe emërime të reja në administratën e qytetit.
