Nga Ylli Pata
Ndërkohë që në emra qeveria e dytë e Edi Ramës ishte thuajse një reprizë e së parës, struktura e saj jo vetëm që ka ndryshuar totalisht, por madje në mënyrë dramatike.
Janë krijuar dy superdikastere që nëse nuk menaxhohen apo kontrollohen siç duhet mund të kthehen në përbindsha të vërtetë, pasi qarkullojnë shumë para, shumë influencë, shumë të punësuar; me një fjalë pushtet.
Damian Gjiknuri dhe Arben Ahmetajn drejtojnë realisht 6 ministri të marrë së bashku dhe numrin më të madh të tenderave dhe prokurorimeve publike.
Gjiknuri ka marrë përveç dikasterit të tij, edhe ashtu të madh që kontrollon ente të pasura publike duke nisur nga KESH, AKBN, OSHE, OST, edhe Ministrinë e Transporteve por edhe pjesë të ministrisë së Rregullimit të Territorit, por edhe atë të Transporteve.
Këta dy dikastere kanë në “barkun” e tyre agjenci e polici të ndryshme që kanë qenë pjesë e rëndësishme e “tepsisë”, që Edi Rama e ktheu në metaforën e fushatës që i bindi njerëzit të votojnë për të.
Ndërkohë edhe Arben Ahmetaj, ka në varësi gjithashtu një numër të madh të këtyre drejtorive, duke nisur nga tatimet e doganat, e deri tek zyrat e punës, kempet, apo edhe ISSH-në, e të gjitha strukturat e tij.
Pikërisht në këto struktura është e punësuar “ushtria” e madhe e militantëve të LSI-së.
Largimi i tyre do të ishte i pamundur menjëherë, pasi një pjesë e madhe e tyre kanë fituar edhe statusin e nëpunësit civil. Një largim masiv do t’i kushtojë qeverisë buxhetin e rrogave të thuajse gjysmës së administratës, pasi të ikurit mund të fitojnë gjyqet.
Shumë shpejt, do të strukturohet e gjithë administrata, duke shkrirë thuajse komplot skemën aktuale.
Në ministritë e Gjiknurit dhe të Arben Ahmetajt do të jenë natyrisht pjesa më e madhe e kësaj ushtrie.
Vetë Kryeministri Edi Rama, tha se në mbledhjen e parë të qeverisë “do të shkrijmë policinë gri”, duke ju referuar inspektoratit të kontrollit të automjeteve.
Bashkimi i 6 dikastereve në 2 i jep Ramës mundësinë për të vepruar më lirshëm për ta reformuar administratën siç do ai. Priten që si pasojë e saj të shkrihen dhe krijohen drejtori të reja, duke krijuar premise për largime dhe punësime.
Kryeministri megjithatë dha një shenjë gjatë fjalimit në Asamble që nuk do të ketë fshesë të punonjësve të thjeshtë, por krerëve.
“Kemi administratën më të vogël më rajon, por kemi numrin më të madh të drejtorëve”, tha Rama.
Me shkrirjen e disa ministrive, sidomos atyre me numrin më të madh të drejtorive, do të ishte më e lehtë lëvizja e madhe e të punësuarve.
Ndërkaq, një tjetër faktor që i leverdis shumë kryeministrit, është se nëse do të kishte edhe tre Ministri për t´i mbushur me ministra, atëherë do të kishte më shumë konkurencë dhe telashe brenda PS-së për të emëruar njerëz. Një mundësi por edhe kokëçarje nga kompetiviteti normal.
Por Rama, me emërimin e Gjiknurit dhe Ahmetajt në 6 ministri, u bën të ditur të tijve në PS se nuk ka tepsi as për socialistët, por vetëm për ata që Edi Rama i konsideron si ekip dhe nuk i ka ndryshuar për katër vjet.
Një lëvizje në dukje mund të “mbyllë gojën” e atyre që pretendojnë për karrierë në PS, por që për një kohë të gjatë krijon premisat e një rritje të pakënaqësisë dhe mund të çojë edhe në situatën e 4 viteve më parë, ku si pasojë e promovimit nga Rama të vetëm një grupi njerëzish, në Parlament nuk aktivizohej fare “garda e vjetër” e PS-së.
Jo mund t’i ndodhë edhe kësaj here. Madje shumë më shpejt, pasi Rama nuk e ka më alibinë e “i kam duart e lidhura nga LSI”.
Ndaj kreu i PS-së, deklaroi në Asamble që qeveria kësaj radhe nuk do të jetë e pandryshueshme siç bëri në mandatin e parë, por premtoi rotacion.
Një “karrotë” e gatshme për të bindur njerëzit që dje u zhgënjyen nga mbetja me gisht në gojë prej mos plotësimit të ambicjes.
Por a do të funskionojë. Kësaj radhe duket më e vështirë… /tesheshi.com/
