Nga Blendi Gashi
Kryeministri Isa Mustafa, ditë më parë paralajmëroi se do të zhvillojë takime me të gjitha partitë politike opozitare në vend, si dhe me partnerin e koalicionit qeverisës, Listën Serbe për të debatuar lidhur me projektligjin për Demarkacionin me Malin e Zi.
Kjo ftesë e kreut të ekzekutivit kosovar është parë e vonuar pasi është bërë pas një periudhe mbi një-vjeçare dhe tensioneve të mëdha politike në vend.
Më 1 shtator, ditën kur pritej të hidhej në votim projektligji në fjalë, kryeministri Mustafa e tërhoqi atë, duke thënë se po e bën një gjë të tillë për shkak se një grup parlamentar po vë kushte të cilat nuk mund t’i pranojë shteti i Kosovës.
Kryeministri, edhe pse nuk përmendi cili grup paralamentar, aludoi në Listën Serbe e cila nuk mori pjesë në seancë.
Por deputetë të “Srpska-s”, mohuan menjëherë t’i kenë vënë kushte qeverisë, duke thënë se nuk janë ftuar në takim nga qeveria dhe se ka disa muaj që nuk janë takuar me qeveritarët e Kosovës.
Drejtues të “Srpska-s”, thonë se derisa me zyrtarët e Kosovës të mos zhvillohen bisedime për Demarkacionin e kufirit të Kosovës me Malin e Zi, qëndrimi i serbëve në institucionet e Kosovës mbetet i pandryshuar. Kështu ka thënë deputeti Nenad Rashiç.
“Deputetë serbë ende nuk janë ftuar në asnjë takim lidhur me demarkacionin me Malin e Zi. Tani në këtë moment, nuk ekziston asnjë qëndrim për demarkacionin. Se a do të marrim pjesë në seancën kur në rend dite të jetë demarkacioni, nuk dihet, sepse bisedimet që i kemi kërkuar me ngulm ende nuk është mbajtur”, citon radiokim të ketë thënë Rashiq.
Qeveria s’e di kur do e thërret “Srpska-n” në takim
Ndërsa, Lista Serbe është në pritje të ftesës së dy partive në koalicion PDK-LDK, për të diskutuar për Demarkacionin, qeveria ende nuk ka një date se kur do të ndodhë takimi.
Bajram Gecaj, zv.ministër, njëherit këshilltar i kryeministrit Mustafa, ka thënë se ende nuk e di se kur do të ftohet Srpska për të diskutuar për shënjimin e kufirit me Malin e Zi.
“Kjo iniciativë vjen pas konsultimeve të parterëve të koalicionit”, ka thënë Gecaj, shkurt për tesheshi.com.
“Nuk i besohet as Mustafës as Veselit”
Avni Arifi, nga Aleanca për Ardhmërinë e Kosovës (AAK) thotë se ekziston mundësia që pushteti të bëjë koncesione me Listën Serbe, pasi kjo e fundit mund ta kushtëzojë qeverinë me mosvotim të projektligjit për Demarkacionin.
“Qeveria ‘Mustafa’ ka dëshmuar se për arritjen e një qëllimi politik sado i ngushtë që të jetë ai nuk e ka problem të bëj koncesione në dëm të vendit me çdo kënd. PDK-LDK mund të bëjnë koncesione me ‘Srpska-n që janë në përputhje me objektivat e kësaj liste, e ato dihet që janë në funksion të mbajtjes së Kosovës mbrenda kontrollit të Beogradit. Fati është se në këtë rast qeverise po i duhen votat e deputetëve shqiptar e të cilat nuk i ka”, thotë Arifi, për tesheshi.com
I pyetur për deklarata e kryeministrit Mustafa dhe kryekuvendarit Veseli të cilët thonë se nuk pranojnë kushtëzime as nga Lista Serbe, Arifi thotë se nuk duhet t’iu besohet deklaratave që japin dy krerët e vendit.
“Asgjë nuk ju besohet asnjërit e as ata njëri-tjetrit. Më kujtohet qëndrimi i kryeministrit Mustafa se nuk shkon në Bruksel pa u bërë liberalizimi i vizave. E dini si përfundoj ai qëndrim”, thotë Arifi, për tesheshi.com.
Ndryshe, para dy javësh kur dështoi votimi në Kuvend i projektligjit për Demarkacionin me Malin e Zi, kryeministri Mustafa paralajmëroi se shumë shpejt do të ndodh riprocedimi i tij. Mirëpo, as pas 13 ditësh, nuk ka ndodhur ky riprocedim.
Sipas të gjitha gjasave, arsyeja kryesore pse Demarkacioni nuk po riprocedohet, është mungesa e votave nga koalicioni qeverisës. /tesheshi.com/
