Shumë rrugë në Baltimore të Shteteve të Bashkuara të Amerikës janë shpallur “zona lufte”, pas një nate të dhunshme në këtë qytet. Në kryeqytetin prej 60 kilometrash katrorë ka pasur përplasje mes policisë dhe protestuesve, të cilët i kanë vënë flakën qytetit.
Të mëdha kanë qenë dëmet e shkaktuara nga acarimi i turmave që protestojnë për vdekjen e të riut afro-amerikan Freddie Gray dhe dhunës së ushtruar nga ana e policisë.
Bilanci i fundit zyrtar flet për të paktën 15 struktura të vëna në flakë, mes së cilave një ndërtesë në ndërtim e sipër si dhe dyqane të ndryshme, 144 automjete të shkrumbuara dhe dhjetëra vitrina dyqanesh të shkatërruara.
Gjatë shkëmbimit të zjarrit janë plagosur rëndë të paktën 15 agjentë, mes së cilëve 6 në gjendje të rëndë ndërsa nga ana e protestuesve janë arrestuar rreth 220 persona.
Është e njëjta gjendje si një vit më parë në Ferguson. Komuniteti afro-amerikan dhe jo vetëm, ka protestuar pas vrasjes nga ana e policisë të djalit me ngjyrë, Freddie Gray. Gray pësoi dëmtime të shtyllës kurrizore pas arrestimit të tij më 12 prill dhe një javë më vonë ai vdiq.
Ditën e varrimit të Freddie, nga lutje për shpirtin e tij, popullsia u rebelua dhe nisi të protestojë në mënyrë të dhunshme kundër policisë duke shkaktuat shkatërrimin e ndërtesave nëpërmjet thyerjes dhe vënies së zjarrit në disa rrugë të qytetit.
Trazirat nisën të hënën, vetëm pak orë më pas Guvernatori i shtetit Maryland, Larry Hogan, shpalli gjendjen e jashtëzakonshme dhe aktivizoi Gardën Kombëtare për të ndihmuar në rivendosjen e rendit. Ai e nënshkroi urdhrin të hënën më 27 prill me kërkesë të qytetit Baltimore.
Në një konferencë shtypi, kryetarja e bashkisë së qytetit Stephanie Raëlings-Blake tha se po vendoste ndalim-qarkullimin pasi disa “vandalë” po përpiqeshin të shkatërronin qytetin dhe të nxisnin dhunën. Ndalim-qarkullimi hyn në fuqi sot nga ora 10 e mbrëmjes deri në 5 të mëngjesit dhe pritet të vazhdojë një javë.
Presidenti Barack Obama ka bërë me dije se është duke ndjekur zhvillimin e situatës nga Shtëpia e Bardhë, ku ka marrë ministren e re të drejtësisë, Loretta Lynch, e cila është e para afro-amerikane që mban këtë post.
Fredericka Gray, motra binjake e të ndjerit Freddie ka apeluar në media të ndryshme për ndalimin e dhunës. Përpara kamerave ajo ka thënë: “Mos u tregoni të dhunshëm. Mbani parasysh që Freddie nuk ishte një person i dhunshëm.” /tesheshi.com/
