“Ne duhet të shmangim skenarin ku NATO dhe Rusia ‘bien në gjumë në luftë’, pasi liderët nuk mund të marrin telefonin dhe t’i shpjegojnë njëri-tjetrit se çfarë po ndodh,” tha James Stavridis, ish-komandanti i forcave të NATO-s në Evropë, shkruan Washington Post, i cili zbuloi një detaj të aktualitetit të trazuar ushtarak pas agresionit rus në Ukrainë.
Ministri rus i Mbrojtjes Sergei Shoigu dhe shefi i Shtabit të Ushtrisë Ruse Valery Gerasimov kanë mbajtur një “heshtje” që nga dita e sulmit ndaj Ukrainës – duke refuzuar të bëjnë telefonata me homologët e tyre amerikanë, pavarësisht përpjekjeve të përsëritura të SHBA-së dhe shefit të Forcave të Armatosura, Gjeneralit Mark Milley.
Washington Post vëren se refuzimi i palës ruse për të komunikuar i lë dy fuqitë më të mëdha bërthamore “në errësirë” mbi shpjegimet për lëvizjet ushtarake, duke rritur frikën për një gabim të madh ose një “aksident lufte”.
“Unë dyshoj se problemi qëndron te këmbëngulja e Rusisë se është një ‘operacion ushtarak special’ dhe ngurrimi i tyre për të pranuar natyrën e vërtetë të luftës që ata filluan,” tha Angela Stent, e cila shërbeu në Shërbimin Sekret të SHBA nën Bush.
Ekspertë të tjerë thonë se gjeneralët mund të presin vetëm miratimin nga Putini për të komunikuar me homologët e tyre amerikanë, ndërsa një pikëpamje tjetër është se Putini tani i sheh Shtetet e Bashkuara si një kundërshtar të vendosur.
“Ekziston një rrezik i madh i përshkallëzimit pa kontaktin e drejtpërdrejtë të zyrtarëve të rangut më të lartë,” tha admirali James Stavridis, i cili shërbeu si Komandant i Forcave të NATO-s në Evropë nga 2009 deri në 2013.
“Ata që po fluturojnë me avionë dhe po kryejnë operacione ushtarake në Ukrainë nuk janë diplomatë dhe veprimet e tyre në intensitetin e operacioneve ushtarake mund të keqkuptohen.”
“Ne duhet të shmangim skenarin ku NATO dhe Rusia ‘bien në gjumë’ drejt luftës, sepse liderët nuk mund të marrin telefonin dhe t’i shpjegojnë njëri-tjetrit se çfarë po ndodh,” tha Stavridis, duke vënë në dukje se çfarë mund të jetë një “skenar makthi: “Supozojmë se një raketë ruse ose një avion luftarak godet një pozicion amerikan në kufirin polako-ukrainas. Komandanti lokal mund të përgjigjet menjëherë, duke pasur parasysh se kjo goditje është pararojë e një sulmi më të gjerë. Kjo mund të çojë në një përshkallëzim të pakthyeshëm, i cili mund të përfshijë edhe përdorimin e armëve bërthamore.”
Siç dihet, SHBA dhe Rusia mbajnë një “telefon të kuq” – një “kanal de-përshkallëzimi” – por ekspertët thonë se vlera e tij zvogëlohet shumë kur udhëheqësit ushtarakë nuk flasin.
Përveç çdo takimi që ambasadori amerikan ka pasur në Moskë, i vetmi kontakt që të dyja palët kanë pasur që nga pushtimi rus ishte ai i Këshilltarit të Sigurisë Kombëtare Jake Sullivan me homologun e tij rus, Nikolai Patrushev, javën e kaluar. /tesheshi.com/
