Nga Blendi Gashi
16 vjet pas përfundimit të luftës, në Kosovë kanë dalë në pah të bëmat edhe “tradhëtitë” që kanë ndodhur në mes ish-prijësve të Ushtrisë Çlirimtare të Kosovës.
Rexhep Selimi, Ramiz Lladrovci dhe Gani Geci, ditëve të fundit kanë zhvilluar nga distanca, përmes rrjeteve sociale dhe mediave, një debat të nxehtë për mospajtimet që kishin ndodhur gjatë kohës së luftës.
E gjitha nisi në seancën e së premtes në Kuvend, kur Rexha i tha Hashim Thaçit se e dëshiron për president, aq sa e dëshiron familja Jashari.
Pas kësaj deklarate, i menjëhershëm ka qenë reagimi i ambasadorit të Kosovës në Shqipëri, Ramiz Lladrovci, i cili në rrjetin social Facebook, duke thënë se Selimit ia ka shpëtuar miqësinë me Adem Jasharin, ashtu si edhe jetën pas asaj tradhëtie ndaj Bacës Adem.
Edhe Gani Geci ka thënë se është në dijeni për prishjen e raporteve mes Adem Jasharit e Rexhep Selimit, edhe pse të dy këta kohë më parë kishin marrëdhënie të mira mes tyre.
Por Lladrovcit nuk i ka pëlqyer ndërhyrja e këtij të fundit, për të cilin tha se nuk e njeh mirë dhe ka vetëm “njohje sipërfaqësore” me të.
Rexhep Selimi, në një intervistë dhënë për mediat ka thënë se, edhe pse kanë tentuar ta përçajnë atë me Adem Jasharin, një gjë të tillë kurrë nuk e kanë arritur.
Por shtrohet pyetja se pse pikërisht pas 16 vitesh dalin në pah përçarjet dhe mospajtimet që ishin mes disa ish-drejtuesve të UÇK-së?!
A mos vallë është Gjykata Speciale e cila pritet të nis funksionimin në pjesën e dytë të këtij viti të jetë shkas që personat në fjalë të hedhin akuza ndaj njëri-tjetrit?
Avokati Gashi: Lufta e komandantëve nga Drenica, pasojë e dy krahëve
Avokati Tomë Gashi thotë se lufta mediale, e posaçërisht lufta në rrjetet sociale në mes të komandantëve të shquar të UÇK-së, në veçanti të atyre nga Drenica është pasojë e së paku dy krahëve të ish-komandantëve të UÇK-së, atyre “pro” dhe “kundër” Thaçit president.
Ai thotë se lufta mediale po bëhet në mes shokëve të luftës të Drenicës dhe të atyre që duket se kanë qenë shumë afër komandantit Adem Jashari.
“Nëse komandantët e shquar të Drenicës gjatë luftës kanë pas probleme të tilla siç përmenden në media, atëherë po del se së paku një energji e madhe e asaj ushtrie vullnetare të UÇK-së është shpenzuar në ‘luftimin’ e njëri-tjetrit e jo në luftimin e agresorit serb. Sido që të jetë kjo luftë mediale do të duhet të zbardhet plotësisht dhe të dihet e vërteta nëse diçka e tillë ka ndodhur, e kjo do të jetë në të mirë të të gjithëve e posaçërishtë në të mirë të atyre që janë involvuar në këtë luftë mediale të komandantëve.
E vërteta mund të dhemb më pak se e pavërteta, ngase e pavërteta mund të ketë pasoja më të mëdha”, ka thënë avokati Gashi për tesheshi.com.
Analistët: Prapa akuzave fshihen shumë enigma
Njohësit e rrethanave politike në vend, thonë se akuzat mes disa ish-prijësve të UÇK-së po nxjerrin në dritë anën e errët të tyre, atë që kanë mbajtur të fshehur që nga paslufta.
Analisti politik Azem Vllasi, thotë se të gjitha akuzat që po zhvillohen ditëve të fundit mes disa ish-drejtuesve të UÇK-së po bëhen për pushtet e jo për arsye se do të funksionohet Gjykata Speciale.
“Nuk është për Specialen po për pushtet. Krejt janë kapur rreth pushtetit. Çështja është kush ka me u pozicionu. Problemet e veta në kohën e luftës i kanë vë në pak tani kur po bëhet lufta për pushtet, për rënien apo jo të Qeverisë”, thotë Vllasi për tesheshi.com.
Analisti Faik Krasniqi, thotë se konsideron se prapa këtyre akuzave fshihen shumë enigma që kanë ndodhur gjatë kohës së luftës dhe vrasjet enigmatike që kanë ndodhur gjatë dhe pasluftës në Kosovë. Ai thotë se po të kishte drejtësi që punon për interesa të popullit dhe të shtetit, do të ishte marrë me këta komandantët të cilët po bëjnë akuza kundër njëri-tjetrit për vrasje dhe tradhëti gjatë luftës.
“Por meqë drejtësia jonë ka dështuar pasi është e kapur nga mafio-politika, atëherë i ka ngelur Gjykatës Speciale që t’i zbardh të gjitha pisllëqet e bëra gjatë dhe pas luftës në Kosovë”, thotë Krasniqi për tesheshi.com.
Portali tesheshi.com gjatë ditës ka biseduar edhe me disa ish-komandantë dhe ish-drejtues të UÇK-së, por ata nuk kanë dashur të deklarohen për akuzat e ndërsjella që po ndodhin mes Rexhep Selimit, Ramiz Lladrovcit e Gani Gecit duke thënë se personat në fjalë kanë qenë shokë mes vete dhe nuk duan të flasin për temat që kanë ngritur së fundmi në opinion. /tesheshi.com/
