Nga Blendi GASHI
Para më shumë se gjashtë viteve, persona që ende nuk janë identifikuar, kishin arritur që nga Dhoma e Dëshmive që është me sigurinë më të lartë brenda në objektin e Policisë së Kosovës, të vjedhin rreth 50 kg drogë, armë, dëshmi dhe shumë gjëra të tjera me vlerë.
Shumë zyrtarë të lartë qeveritarë dhe të policisë, që nga viti 2009 janë deklaruar se ky rast është drejt zbulimit dhe shumë shpejt pritet arrestimi i autorëve që kanë kryer vjedhjen.
Mirëpo, këto deklarata nuk dolën aspak të vërteta. Këtë skandal e ka mbuluar pluhuri, askush më nuk është i interesuar të merret e lëre ta zbulojë vjedhjen më të famshme në vend.
Portali mbarëkombëtar tesheshi.com ka vendosur të riaktualizojë këtë temë që goditi dhe prishi imazhin e ndërtuar me vite nga policia.
Pyetja kryesore vazhdon të mbetet, pse dhe kujt po i konvenon të mos zbulohet skandali i rëndë që dëmtoi jashtë mase institucionin e policisë?
Ish ministri i Punëve të Brendshme, Zenun Pajaziti, i cili drejtonte këtë dikaster të rëndësishëm në vitin kur ndodhi vjedhja ka thënë për portalin tesheshi.com se që nga ajo kohë në asnjë angazhim që ka pasur më tej në politikë nuk është marrë me sferën e sigurisë.
Megjithatë, ai ka një sugjerim se kujt duhet t’i adresohet pyetja se pse nuk po zbulohet mënyra se si ndodhi vjedhja.
“Siç e dini në atë kohë tranzitore ka pasur përgjegjësi EULEX-i dhe drejtuesit e policisë. Ndoshta, kjo pyetje më shumë se mua është mire t’i adresohet njerëzve aktual që merren me këtë sektor, ministrit aktual të Brendshëm, drejtorit të policisë që ka qenë drejtues i shtyllës përgjegjëse në atë kohë dhe pse jo edhe presidentes së vendit e cila ka qenë pjesë e menaxhmentit të policisë në atë kohë”, ka deklaruar Pajaziti.
Ish deputeti Burim Ramadani, njëherësh njohës i çështjeve të sigurisë ka deklaruar për tesheshi.com se vjedhja epokale në polici edhe me tutje, mbetet njolla më e rëndë për këtë institucion dhe nuk lejon rritjen e besimit në profesionalitetin e saj.
“Në bindjen time, gjatë këtyre viteve i është vënë dryni kësaj çështjeje dhe kështu po vazhdon edhe tash. Kjo, normalisht, se nuk mund dhe nuk duhet të jetë përgjithmonë. Nuk ka alternativë zbardhja e plotë e saj. Normalisht se po të duan, mund ta zbardhin qysh sot”, ka thënë Ramadani.
Eksperti i sigurisë, Naim Maloku, shprehet për tesheshi.com se vjedhja e dhomës së dëshmive mund të ketë elemente korruptive për shkak se janë eliminuar dëshmi të proceseve për të cilat opinioni kurrë nuk është informuar.
“Proceset apo veprat kriminale janë dëmtuar me zhdukjen e atyre dëshmive. Kjo është e njëjtë sikur materialet e ish Agjencisë Kosovare të Mirëbesimit kur u dogjën. Pra, u dogjën me qëllim dëshmi të privatizimeve korruptive dhe kriminale të pasurisë shtetërore dhe publike në kohën e AKM-së”, shprehet Maloku.
Prokuroria Speciale e Kosovës ka deklaruar për media muaj më parë se po zhvillohen hetime të mëtejshme për rastin në fjalë.
Fillimisht rasti ishte hetuar nga Policia e Kosovës e cila kishte formuar edhe një Task Force, pastaj rasti ka kaluar në Prokurorinë Speciale e tek zyrtarët e EULEX-it, mirëpo askush nuk arriti ta zbardhë skandalin që vazhdon të mbetet një mister.
Ndryshe, edhe në dhomën e dëshmive në Pejë ishin vjedhur 25.3 kilogramë ari në vitin 2012./te sheshi.com/
