Nga Bekim Laci
Nisma e Tiranës dhe Prishtinës zyrtare për t’bërë bashkë BDI-në e Ali Ahmetit dhe PDSH-në e Menduh Thaçit, duket si një mision i pamunduar, aq më shumë kur armiqësia mes të tyre tashmë ka tejkaluar kufirin politik, me shpifje dhe ofendime të llojeve të ndryshme, rrahje të deputetëve në parlament, ndësa retorika nxitëse ka çuar deri në acarim, shoqëruar me incidente të armatosura mes idhtarëve të të dyja partive; dhe së këndejmi, një koalicion eventual mes tyree do t’ishte një “makiavelizëm” i llojit të vet.
Janë vetë zyrtarë të lartë të këtyre dy partive që për portalin tesheshi.com, konfirmojnë interesin e Tiranës dhe Prishtinës, respektivisht të Edi Ramës dhe Hashim Thaçit për pajtim mes dyshes Ahmeti-Thaçi, secila me nga një variant të vetin.
Në partinë shqiptare në pushtet, BDI, thonë se iniciativa e Ramës mund të jetë e sinqertë, por ai nuk njeh mirë realitetin politik në Maqedoni. “Kam përshtypjen që Rama nuk është mjaftushëm i informuar për situatën këtu”, na tha një zyrtarë i BDI-së, në kushte anonimiteti, ndërkohë që opozita shqiptare kërkon bisedime serioze:
“Po bëhet një kohë prej kur Rama tenton të inicojë një bashkëpunim mes dy partive, por për t’ardhur deri tek kjo, nevojiten bisedime serioze”, na tha një zyrtarë i PDSH-së.
Deklaratat e Hashim Thaçit dhe Edi Ramës për bashkimin e dy subjekteve të njohura, nuk kanë kaluar heshturazi në Maqedoni, përkundrazi, ato u morën seriozisht.
Ish ministri për Arsim, Sulejman Rushiti, thotë se gjithë ata që vlerësojnë se bashkëpunimi mes BDI-së dhe PDSHsë është zgjidhja reale e problemeve politike të shqiptarëve në Maqedoni, ose nuk kanë njohuri për rrethanat ose kanë axhenda që janë në interes të individëve dhe jo të qytetarëve.
“Sa i përket bashkëpunimit të mundshëm BDI-PDSH, duke ndjekur qëndrimet politike, njëra de jure në qeveri me VMRO-më dhe tjetra de fakto, është shumë më e logjikshme një koalicion edhe de jure.
Ajo që politika në Shqipëri dhe Kosovë nuk e ka vlerësuar mjaftueshëm, janë rrethanat e reja politike që po lindin pas publikimit të përgjimeve nga ana e Zaevit”, shprehet Rushiti.
Ndërsa lëvizja Besa, respekton vullnetin politik të Tiranës e Prishtinës, pasi siç thotë Zeqirija Ibrahimi, ato janë shtete te pavarura dhe vetë i vendosin politikat e tyre, por sipas tij, gabojnë nëse mendojnë se bashkimi i PDSH-së dhe BDI-së e fuqizon kombin shqiptar në Maqedoni:”Duke bashkuar tradhtinë, injorancën, krimin dhe korrupsionin, nuk bën asgjë më shumë, pos që e rrit vëllimin e tradhtisë, të injorancës, të krimit dhe të korrupsionit. Ndërkaq, jam i sigurt se as Prishtina, e aq më pak Tirana, janë të interesuara për axhendë antishqiptare në Maqedoni. Bashkimi nuk nënkupton gjithnjë vlerë positive”, thotë Ibrahimi.
Ditë më parë, Zijadin Sela, theksoi se nuk është i befasuar nga paralajmërimet për bashkëpunim eventual mes BDI-së dhe Menduh Thaçit, pasi sipas tij të dy subjektet tashmë janë një, kur bëhet fjalë për pengimin e forcave të reja politike.
Ditë më parë, kryeministri Edi Rama në rrjetin social Tëiter publikoi një fotografi me tekst: “Me Menduh Thaçin pas bisedës inkurajuese për marëdhëniet konstruktive që po krijohen mes dy partive shqiptare atje, ndërsa më herët ministri i jashtëm i Kosovës Hashim Thaçi, pas takimit me Menduh Thaçin deklaroi se marrëveshja mes BDI-së dhe PDSH-së do t`i bëntë forcën më të fuqishme politike në Maqedoni.
Por të gjithë këto, për momentin ngjajnë me “ëndërra pranverore”, pavarsisht vullnetit të mirë të ëndërruesve për t`i bërë ato realitet. /tesheshi.com/
