Ndodh shpesh që t’ detyrojmë fëmijët e vegjël të puthin apo të përqafojnë persona të caktuar. Psiko-pedagogët nga e gjithë bota sugjerojnë që fëmijës ti lini një autonomi për të bërë atë që dëshiron me trupin e tij, ndaj duhet të tregoni durim nëse i vogli nuk shfaq gjeste afeksioni ndaj një familjari.
Kur e detyrojmë një fëmijë të bëjë një akt fizik, siç është dhënia e një puthjeje apo një përqafimi, imponojmë një lloj autoriteti mbi trupin e personit. Lënia e lirë e fëmijës është shumë e rëndësishme për zhvillimin dhe rritjen e tij. Pjesa më e madhe e abuzimeve ndaj fëmijëve në familje ndodh për shkak të autoritetit që një nga prindërit ka mbi fëmijën.
Kjo është arsyeja pse disa prindër kanadezë, bashkë me një ekip psikologësh kanë shpërndarë tre rregulla të thjeshta që duhet të ndiqen, në mënyrë që të vegjlit të kenë lirinë për të vepruar mbi trupin e tyre:
T’ua lini fëmijëve zgjidhjen për të puthur apo për të përqafuar një të afërm. Nëse fëmija nuk do, nuk ka problem, mos e detyroni.
Ofrojuni fëmijëve alternativa të tjera për të krijuar kontakt fizik me të afërmit, si për shembull shtrëngimi i dorës.
T’ia shpjegoni këtë të gjithë familjes. “Po u mësojmë fëmijëve tanë të kenë liri të plotë për të vendosur mbi trupin e tyre. Ju falenderojmë nëse respektoni dëshirat dhe zgjedhjet e tyre”./tesheshi.com/
