Rregullatori i konkurrencës në Itali tha se ka nisur një hetim ndaj pronarit të Facebook, Meta, duke pretenduar se ka abuzuar me pozicionin e tij dominues në treg në negociatat me shoqëritë e artistëve mbi pagesën e honorarëve për publikimin e veprave të tyre.
Shoqëria italiane SIAE përfaqëson aktorë, kërcimtarë dhe artistë të tjerë dhe negocioi një licencë me Meta-n për të përdorur veprat e tyre në platforma të tilla si Facebook dhe Instagram.
Platformat e Meta-s negociojnë me kompanitë që përfaqësojnë artistët për kushtet e botimit të veprave të tyre dhe pagesën e tarifave.
Mosmarrëveshje mes Meta-s dhe SIAE
Kontrata mes Meta-s dhe SIAE skadoi në janar dhe negociatat për zgjatjen e saj ngecën dhe në fund të marsit kur Meta ndaloi muzikën e artistëve të përfaqësuar nga kompania në platformat e saj.
Muzika e anëtarëve të shoqërisë italiane nuk gjendet më as në postimet e vjetra.
Sipas rregullatorit, Meta ka përfituar nga varësia ekonomike e SIAE dhe ka dëmtuar konkurrencën e saj. Autoritetet vënë në dukje se Meta ka penguar edhe muzikantët e SIAE që të promovojnë veprat e tyre në rrjete të tjera sociale.
Kompania amerikane është e gatshme të bashkëpunojë me autoritetet italiane, tha zëdhënësi i Meta-s, duke shtuar se dëshiron të arrijë një marrëveshje që do t’i përshtatet të dyja palëve. /tesheshi.com/
