Një zë nga mazhoranca ka komentuar deklaratën e kreut të diplomacisë ruse me nëntekst mbështetjeje ndaj “Open Balkan”, e cila ushqeu dhe më tepër teorinë konspirative te kundërshtarët e projektit se pas saj qëndron Rusia. Lavrov, duke komentuar pengesën që iu bë nga tre vende ballkanike për të fluturuar drejt Beogradit, tha se Perëndimi, që sipas tij ka nxitur ato(për të mbyllur hapësirën ajrore), “do një Ballkan të mbyllur dhe jo të hapur”.
Por pse e tha ai këtë dhe është vërtet Rusia mbështetëse e këtij projekti të debatueshëm?
Për nr. 2 të qeverisë Arben Ahmetaj, deklarata ishte “cinizëm politik dhe provokim”.
“Ajo që tha Lavrov është cinizëm politik dhe provokim për të dëmtuar ‘Open Balkan’.
Kushdo që është kundër Open Balkan është kundër Shqipërisë për t’u hapur dhe integruar në Bashkimin Europian. ‘Open Balkan’ është gjëja më e mirë që i ndodh Ballkanit, e mbështetur nga BE dhe SHBA. Është teori politike dhe ekonomike: ditën që kufijtë hapen për të katërt, janë qytetarët që përfitojnë. Kush e kundërshton këtë ose e bën me qëllim ose nuk e njeh”, u shpreh zv/kryeministri Ahmetaj.
Kujtojmë se ky është reagimi i parë ndaj deklaratës së Lavrovit nga qeveria shqiptare prej ditës kur u tha. /tesheshi.com/
