Gjigandi amerikan i energjisë ExxonMobil ka paditur Bashkimin Evropian (BE) për ta detyruar atë të heqë një taksë të re për të ardhurat e papritura të kompanisë së naftës.
Një taksë e papritur vendoset për kompanitë që përfitojnë nga diçka për të cilën nuk janë përgjegjëse dhe kompanitë e energjisë tani po fitojnë shumë më shumë para nga shitja e naftës dhe gazit, pjesërisht për shkak të problemeve të furnizimit të shkaktuara nga pushtimi rus i Ukrainës.
ExxonMobil, e cila raportoi një fitim tremujor prej afro 20 miliardë dollarësh në tetor, akuzoi BE-në për tejkalim të autoritetit të saj ligjor duke vendosur taksën.
ExxonMobil e quan masën “kundërproduktive” dhe pretendon, si kompanitë e tjera të mëdha në sektorin e naftës dhe gazit, se ajo dekurajon investimet.
Presidentja e Komisionit Evropian Ursula von der Leyen njoftoi në shtator një plan sipas të cilit kompanitë e mëdha të naftës, gazit dhe qymyrit duhet të paguajnë tatimin mbi fitimet e rritura në vitin 2022.
Taksa e re
Plani kërkon që kompanitë të paguajnë një taksë prej 33 për qind mbi fitimet e këtij viti që janë të paktën 20 për qind më të larta se fitimi mesatar për tre vitet e mëparshme.
Në një padi të paraqitur në Gjykatën e Përgjithshme të BE-së, me qendër në Luksemburg, ExxonMobil tha gjithashtu se taksa e re minon besimin e investitorëve.
Në një takim të fundit të investitorëve, shefi financiar i ExxonMobil vlerësoi se taksa e re e BE-së do t’i kushtonte kompanisë “më shumë se dy miliardë dollarë”.
Komisioni Evropian pretendon se taksa e re është “plotësisht në përputhje me ligjin e BE”.
BE-ja po përpiqet të gjejë burime alternative për sasinë e energjisë që blente nga Rusia deri këtë vit. Ministrat e vendeve anëtare të BE-së vlerësojnë se mund të mbledhin 140 miliardë euro duke vendosur taksa për kompanitë që kanë më shumë fitime se më parë për shkak të rritjes së kërkesës. /tesheshi.com/
