Predikimi islam është shndërruar në “terapi shoku” kryesore në burgjet shqiptare, si ndër mundësitë e mëdha, pse jo, më e madhe e ftillimit për individë që jo thjesht një gabim apo një shkelje e zakonshme ligjore i ka çuar pas hekurave.
Në xhuma e ditë të caktuara, imamë të angazhuar për komunikim me të dënuarit, pothuajse në të gjita burgjet e Shqipërisë, u kumtojnë atyre kuptimin e drejtë te jetës me referencë hyjnore, si dhe atë që duhet të jenë në jetë, po me referencë hyjnore, pas devijimit në akte të ndryshme kriminale.
Kjo ka bërë që shumë të dënuar, më shumë se burgu, t’i shkundë mesazhi i fuqishëm islam.
Në këtë vazhdë, kreu i Burgjeve ishte në KMSH, duke u takuar aty me kreun e jetës institucionale islame, Bujar Spahiu. Krah tij, Edvin Kuçi, një ndër predikuesit e burgjeve, i cili për nga profesioni është edhe avokat.
Në njoftimi zyrtar, thuhet se, “Kryetari i Komunitetit Mysliman të Shqipërisë, H. Bujar Spahiu, priti në selinë e KMSH-së Drejtorin e Përgjithshëm të Burgjeve, z. Klevis Qose.
Kryetari i KMSH-së fillimisht e uroi z. Qose për detyrën e re dhe e siguroi atë që KMSH do të vazhdojë të kontribuojë edhe më tej duke e rritur bashkëpunimin mes dy institucioneve.
Në fjalën e tij, z. Qose, vlerësoi kontributin e deritanishëm të KMSH-së në rëndësinë e mbështetjes morale dhe shpirtërore për të ndihmuar të burgosurit në procesin e tyre të rehabilitimit dhe riintegrimit si dhe çdo kontribut që KMSH jep në IEVP-të e vendit me anë të punonjësve të tij”. /tesheshi.com/
