Nga Mensur Krasniqi
Ndërsa vijon të thellohet kriza politike, mbretëron një qetësi absolute në skenën politike të Maqedonisë. Ka një javë që kur asnjëri nga liderët partiak, e as përfaqësues të komunitetit ndërkombëtar nuk kanë hapur gojën të thonë qoftë edhe një fjalë se ç’po ndodh me këtë shtet?! Dhe me këtë rast, për të zbuluar arsyet dhe fshehtësinë e krijimit të këtij ambienti të qetë politik, në kushte të krizës së thellë politike, portali tesheshi.com ka marrë qëndrimin e ish-deputetit në rradhët e PPD-së, Ismet Ramadani, analistin Hadi Osmani, si dhe kryeredaktorin e gazetës “Lajm”, Isen Saliu.
Ismet Ramadani: Është një heshtje para një stuhie që pritet të ndodhë javën e ardhëshme
“Është një farë heshtje e liderëve të partive politike sa i përket mundësisë për tu takuar dhe për të bërë hapin tjetër më tutje rreth Marrëveshjes së Përzhinos dhe datës së zgjedhjeve. Është një taktizim i opozitës dhe një pritje se si do të reagojë kryetari i shtetit lidhur me abolimet selektive. Unë mendoj se në javën që vjen do të ketë lëvizje më radikale në skenën politike. Prej ditës së hënë pritet që edhe numri i protestuesve nga sektori civil të rritet dhe të radikalizohet sepse ka të dhëna ku thuhet se në këto protesta drejtpërdrejt do të kyqet edhe opozita maqedonase. Nuk e di, por mendoj se do të ftohen edhe opozitarët shqiptarë, dhe në këtë formë do të përcillet një mesazh shumë më serioz për partitë të cilët janë në pushtet. Pritet që edhe Prokuroria speciale të dalë me diçka më të re në drejtim të hetimeve të tyre dhe me aktakuza të reja për kriminalitetin e pushtetarëve. Gjithashtu brenda javës së ardhshme do të bisedohet për ndonjë datë zyrtare të mbajtjes së zgjedhjeve, mundet ato të jenë në muajin tetor, eventualisht me një alternativë bashkë me zjedhjet lokale. Kështu pra, pritet të intensifikohen aktivitetet e opozitës, dhe pastaj të shihet cili do jetë reagimi i partive në pushtet, po me këtë sigurisht edhe reagimi i ndërkombëtarëve. Me siguri që kjo është një heshtje para një stuhie, që pritet të ndodhë brenda javës së ardhshme”, ka deklaruar Ismet Ramadani për portalin tesheshi.
Hadi Osmani: Me këtë qetësi dhe relaksim opozita e arsyeton pushtetin para ndërkombëtarëve
“Si pasojë e caktimit të zgjedhjeve me 5 Qershor pa mos u plotësuar kushtet si dhe pas faljes së kriminelëve nga presidenti Ivanov në Maqedoni u krijua një eufori dhe mllef i madh i cili shpëtheu në protesta nëpër rrugë.
Pasi që zgjedhjet u shtyen për afat të caktuar opozita që krijonte protesta tash ndjehet më e relaksuar për shkak se mendon se ka më shumë kohë deri në zgjedhje. Në fakt opozita nuk e kërkon kohën për tu plotësuar kushtet e zgjedhjeve por kërkon të fitojë më tepër kohë për Prokurorinë Speciale e cila duket si e vetmja shpresë për ti mbyllur në burgje politikanët e korruptuar. Me këtë heshtje dhe relaksim opozita po i jep favore qeverisë e cila tani mund t’i thotë faktorit ndërkombëtar se ja, populli është i qetë dhe është me ne. Opozita duhet të bëj presion të jashtëzakonshëm në forma të ndryshme në mënyrë që të tërhiqet abolimi i plotë si dhe të formohet gjykatë speciale e cila përfundimisht do i burgoste politikanët e korruptuar që na kanë vjedhur të ardhmen. Pa mos përfunduar në burg politikanët që na sollën këtë krizë kurrën e kurrës nuk do të përfundojë as kriza”, kështu është shprehur analisti Hadi Osmani për portalin tesheshi.
Isen Saliu: Qetësia e partive politike ka të bëjë me paqartësitë lidhur me datën e zgjedhjeve
“Mendoj se partitë po bëjnë riorganizim të radhëve të tyre dhe përgatitje të strategjive të reja, se si të veprohet në skenë pas pushimeve verore edhe pse nuk përjashtohet mundësia që zhvillime dinamike politike të ketë edhe gjatë muajve të verës. Qetësia e partive në masë të madhe ka të bëjë edhe me paqartësitë lidhur me datën e re të zgjedhjeve të parakohshme dhe me dilemat nëse sivjet do të ketë fare zgjedhje ose jo”, deklaroi Isen Saliu për portalin tesheshi. /tesheshi.com/
