Kombet e Bashkuara dhe anëtarët evropianë të Këshillit të Sigurimit të KB i kanë bërë thirrje Izraelit të ndalojë shkatërrimin e vendbanimeve beduine në Luginën Jordan dhe të lejojë organizatat humanitare hyrjen në komunitetin në Humsa Al Baqaia.
Në një deklaratë të përbashkët pas takimit të Këshillit të Sigurimit për Lindjen e Mesme, Estonia, Franca, Irlanda, Norvegjia dhe Mbretëria e Bashkuar thanë se ata ishin “thellësisht të shqetësuar për ri-shkatërrimin dhe konfiskimin e pronës së fundit, duke përfshirë objektet e financuara nga BE dhe donatorë të tjerë kryer nga autoritetet izraelite në Luginën e Jordanit”.
Ata shtuan se janë të shqetësuar për rreth 70 njerëz që jetojnë në komunitetin beduinë, përfshirë 41 fëmijë.
“Ne përsërisim thirrjen tonë ndaj Izraelit për të ndaluar shkatërrimin dhe konfiskimin,” tha deklarata.
“Për më tepër, ne i bëjmë thirrje që të lejojë hyrje të plotë, të qëndrueshme dhe të papenguar humanitare në komunitetin në Humsa Al-Baqaia,” shtuan ata.
Ky vend ndodhet në Luginën Jordan, në një rrugë strategjike që konsiderohet thelbësore në luftën për Bregun Perëndimor.
Sipas OKB-së, lugina është shtëpia e rreth 60,000 palestinezëve dhe rreth 90 për qind e vendit është nën kontrollin e plotë të Izraelit.
Palestinezëve u ndalohet hyrja në zonë, si dhe në tokën që zotërojnë. Ata janë të ndaluar të ngrenë mure ose ndonjë infrastrukturë tjetër pa lejen e ushtrisë, e cila është e vështirë për t’u marrë.
Nga 2009 në 2016, më pak se dy për qind e më shumë se 3,300 kërkesave për ndërtim u miratuan, sipas grupit izraelit “Paqja Tani”, i cili lufton kundër ndërtimit të vendbanimeve hebraike.
I dërguari i KB për rajonin, norvegjez Tor Wennesland tha se forcat izraelite “shkatërruan ose morën 80 struktura” nga komuniteti beduin në “zonën e zjarrit të deklaruar nga ushtria izraelite në Luginën Jordan”. /tesheshi.com/
