Një gjykatë izraelite urdhëroi të enjten prishjen e një shkolle të re palestineze në Bregun Perëndimor të okupuar.
Gjykata vendosi që shkolla Ras al-Tenneen në qytetin lindor të Ramallahut ishte ndërtuar pa lejen e nevojshme të ndërtimit dhe refuzoi një apel të ngritur kundër prishjes së saj, tha Abdullah Abu Rahma, një aktivist palestinez.
Ai tha se 50 fëmijë ishin regjistruar tashmë në shkollën, e cila kohët e fundit u ndërtua dhe drejtohet nga Ministria Palestineze e Arsimit.
Abu Rahma tha se aktivistët palestinezë kishin filluar mbledhjen në shkollë për të parandaluar rrënimin e saj.
Shkolla ndodhet në një pjesë të Bregut Perëndimor të okupuar të klasifikuar si zona “C”, e cila është nën kontrollin e plotë të Izraelit sipas Marrëveshjes së Oslos të vitit 1995.
Sipas burimeve palestineze, autoritetet izraelite shkatërruan më shumë se 500 shtëpi palestineze këtë vit.
Forcat izraelite, nën pretekste të shumta, po shkatërrojnë shtëpitë në Jeruzalemin Lindor dhe Bregun Perëndimor.
Kombet e Bashkuara gjithashtu kanë njoftuar se forcat izraelite kanë shkatërruar më shumë se 500 shtëpi dhe ndërtesa palestineze në Bregun Perëndimor të okupuar dhe Jeruzalemin Lindor që nga fillimi i këtij viti.
Një raport nga Zyra e Kombeve të Bashkuara për Koordinimin e Çështjeve Humanitare (OCHA) thotë se forcat izraelite shkatërruan 506 banesa palestineze me pretekstin se ato ishin ndërtuar në mënyrë të paligjshme.
Ata njoftuan se Izraeli kishte shkatërruar 22 shtëpi dhe ndërtesa vetëm në dy javët e fundit dhe se 134 nga 506 shtëpi dhe ndërtesa të shembura këtë vit ishin në Jeruzalemin Lindor.
Zona “A” mbulon 18 përqind të territorit të Bregut Perëndimor dhe palestinezët kanë autoritet administrativ dhe të sigurisë. Zona “B” përbën 21 përqind të Bregut Perëndimor dhe është e ndarë në kompetenca administrative dhe të sigurisë. Zona e tretë dhe më e madhe “C” mbulon 61 përqind të Bregut Perëndimor dhe është plotësisht nën kontrollin e Izraelit.
Eshtë pothuajse e pamundur për palestinezët të marrin një leje ndërtimi ose zgjerimi në pjesën më të madhe të Zonës C, me shpjegimin se ajo është nën kontrollin e administratës izraelite.
Në fund të muajit të kaluar, u njoftua se kryeministri izraelit Benjamin Netanyahu kishte urdhëruar institucionet përkatëse të vendit që të miratonin ndërtimin e një tjetër 5,000 njësish strehimi në vendbanimet ilegale hebraike në Bregun Perëndimor të okupuar.
Stacioni televiziv izraelit TV7 raporton se Netanyahu i bëri thirrje Këshillit Suprem të Planifikimit dhe Ndërtimit të Izraelit që të mblidhej në fillim të tetorit, menjëherë pas festave hebreje.
“Netanyahu ka udhëzuar Këshillin të miratojë ndërtimin e 5,000 njësive të banimit në disa vendbanime të Bregut Perëndimor,” tha i njëjti burim.
Qeveria izraelite as nuk ka konfirmuar dhe as mohuar pretendimet e mediave.
Në javët e fundit, udhëheqësit e vendbanimeve ilegale hebraike kanë protestuar për pasivitetin e Netanyahut kur bëhet fjalë për miratimin e ndërtimeve të reja në ato vendbanime.
“Protestuesit presin që Netanyahu të përmbushë premtimet e tij zgjedhore dhe të intensifikojë ndërtimin,” tha raporti i medias.
Presidenti i Këshillit të Vendbanimeve Hebraike të Bregut Perëndimor, Yossi Dagan tha se miratimi i ndërtimit është një provë e madhe për kryeministrin.
Paralelisht, OJQ PeaceNow pretendon se qeveria izraelite ka miratuar ndërtimin e 3,412 njësive të banimit në Jeruzalemin Lindor të okupuar.
Sipas organizatës, 428,000 njerëz jetojnë në 132 vendbanime ilegale hebraike në Bregun Perëndimor të okupuar.
Kjo nuk përfshin 18 vendbanimet e mëdha në Jeruzalemin Lindor, shtëpia e më shumë se 220,000 emigrantëve hebrenj.
Izraeli pushtoi Bregun Perëndimor në Luftën Gjashtë Ditore në 1967 dhe konsiderohet nga shumica e bashkësisë ndërkombëtare si territor i okupuar. /tesheshi.com/
