Incidentet e urrejtjes ndaj muslimanëve në Mbretërinë e Bashkuar kanë shënuar një rritje të paprecedentë gjatë vitit 2024, sipas të dhënave të përpiluara nga organizata monitoruese Tell MAMA. Sipas raportit të fundit, janë verifikuar 5,837 raste të urrejtjes anti-muslimane, një shifër që shënon një rritje të ndjeshme krahasuar me 3,767 raste të regjistruara në 2023 dhe 2,201 në 2022.
Organizata thekson se konflikti në Lindjen e Mesme, veçanërisht lufta në Gaza, ka nxitur një valë të re islamofobie, veçanërisht në hapësirat dixhitale. “Lufta mes Izraelit dhe Gazës, së bashku me vrasjet dhe trazirat në Southport, kanë kontribuar ndjeshëm në shtimin e rasteve të raportuara të urrejtjes ndaj muslimanëve,” thuhet në deklaratën e Tell MAMA.
Përhapja e dezinformatave dhe rritja e sulmeve
Raporti i organizatës vë në dukje se rritja e incidenteve islamofobe është ndikuar edhe nga përhapja e lajmeve të rreme në rrjetet sociale. Një shembull konkret është rasti i vrasjes së tre vajzave të reja në Southport, ku thashethemet e pabazuara e paraqitën autorin si një emigrant radikal musliman. Këto dezinformata çuan në trazira dhe protesta të nxitura nga grupet e ekstremit të djathtë dhe ato anti-imigracion në të gjithë vendin.
Drejtori i Tell MAMA, Iman Atta, e ka përshkruar këtë situatë si thellësisht shqetësuese dhe ka bërë thirrje për masa të koordinuara nga qeveria për të frenuar rritjen e urrejtjes anti-muslimane. “I bëjmë thirrje publikut të qëndrojë i bashkuar kundër urrejtjes dhe ekstremizmit dhe u kërkojmë atyre që kanë ndikim në jetën publike të jenë të vetëdijshëm për gjuhën e tyre, e cila mund të ushqejë stereotipe të rrezikshme,” ka deklaruar Atta.
Tell MAMA, një organizatë e pavarur e cila monitoron dhe dokumenton rastet e urrejtjes ndaj muslimanëve, ka nisur gjithashtu një fushatë ndërgjegjësimi për të luftuar keqinformimin dhe për të mbështetur viktimat e Islamofobisë në Britani. /Tesheshi.com/
