Lulzim Basha deklaroi në sallën e Kuvendit se Gramoz Ruçit nga viti 2005 i është ndaluar përjetësisht në shkelë në Shtetet e Bashkuara të Amerikës, për shkak të lidhjeve të tij me krimin dhe drogën.
Deklarata e Bashës erdhi në një kohë, kur zgjedhja e Ruçit në postin e kryeparlamentarit është shoqëruar me protesta të ish-të përndjekurve dhe Ambasadori amerikan Donald Lu nuk ishte prezent në seancën e votimit të tij.
Madje diplomati amerikan edhe në seancën e djeshme, në momentin që Ruçi ka marrë fjalën, ka hequr kufjet dhe nuk ka preferuar të dëgjojë, qoftë edhe formalisht se çfarë po thoshte numri dy i shtetit shqiptar.
Por ajo që habiti sot shumëkënd ishte fakti se Ruçi nuk ka reaguar absolutisht ndaj deklaratës së fortë të bërë nga lideri i opozitës. Sapo Basha ka përfunduar fjalën, Ruçi ka vijuar rendin e ditës, duke i dhënë fjalën ministrit Ditmir Bushati.
Heshtja e Ruçit mund të interpretohet si pranim të akuzës së hedhur nga Basha, por edhe si një mënyrë që kreu i ri i Kuvendit zgjodhi për të shmangur replikat dhe debatet e drejtpërdrejta, të cilat mund të çonin seancën në një fund pa krye.
Por cilado qoftë strategjia e zgjedhur, kreu i Kuvendit të Shqipërisë, ka një detyrim para qytetarëve që të sqarojë akuzat, qëndrojnë ose jo, sikundër kreut të mazhorancës që e mbështeti ka të njëjtin detyrim për të pohuar ose mohuar nëse figura e numrit dy të shtetit shqiptar ka apo jo probleme të tilla sikundër deklarohet. /gj.k//tesheshi.com/
