Nga Blendi Gashi
Emërimi i Visar Ymerit si kryetar i Lëvizjes Vetëvendose, asnjëherë nuk u morr seriozisht duke u vlerësuar si kryetar “kukull” e jo i vërteti, ku sidomos opinionistët në vijimësi deklaruan se është Albin Kurti që në prapaskenë mban timonin e partisë.
Për ta dëshmuar këtë, zyrtarisht u kujdes vet kjo parti me mbajtjen e Këshillit të Përgjithshëm dhe shpalljen e zgjedhjeve për kryetar, edhe pse Ymeri ishte kundër për çka edhe nuk mori pjesë në mbledhje.
Se është një kryetar që nuk e pyet askush, e tregoi edhe vet Kurti i cili në pamundësi për të marrë pjesë në mbledhje pasi gjendet në paraburgim, dërgoi një letër ku qartë tregon se Lëvizja mundet edhe pa Ymerin dhe përkrahësit e tij duke e zhvesh edhe formalisht nga pozita e kryetarit.
“Secili aktivist i Vetëvendosje-s është i nevojshëm por asnjëri s’është i pazëvendësueshëm”, thuhet në një pjesë të letrës së Kurtit, i cili ja bën të qartë Ymerit e Molliqajt se mund të rrinë në parti vetëm nën urdhërat e tij por assesi nuk mund ta marrin kreun e partisë.
Si e pranoi humbjen edhe vet Ymeri…
Se nuk i dëgjohet zëri e pranoi edhe vet Ymeri i cili përmes një mesazhi në Facebook tregoi qartë kundërshtinë e tij me mbajtjen e mbledhjes të cilën e quan të ngutshme dhe jo në favor të zgjiedhjes së problemeve edhe pse pranon se proceduralisht dhe në aspektin e statutit nuk ka shkelje ligjore.
“Unë nuk dua tash të flas për detajet as të problemit e as të zgjidhjes. Sepse njëri prej personave të përfshirë në të, Albini, i burgosur, nuk mund të marrë pjesë në këto diskutime. Duke qenë që pjesën më të madhe të diskutimit për këtë çështje e kam bërë me të, nuk dua të flas publikisht pa pasur mundësi ta flas edhe një herë me të. Prandaj edhe kam insistuar edhe në kryesi që kjo çështje të mos hapet pa qenë i pranishëm edhe Albini në mesin tonë. Por ja që kjo kërkesë e imja nuk u përfill. Nuk e di se kujt po i ngutet dhe pse. Por kjo nguti, kam dronë, mund t’i sjellë organizatës sonë dëme të pariparueshme. Prapë, uroj ta kem gabim”, thotë Ymeri.
Ai më pas përmend ndarjen e partisë ku thotë se “pa një kohezion Lëvizja nuk rri e bashkuar. E kur nuk është e bashkuar Lëvizja nuk është e fortë. E kur nuk është e fortë humbim të gjithë. Jo vetëm ne, por e tërë Kosova.
Ymeri pasi “zhveshet” edhe formalisht nga kryetari lëshon një “therr” për Kurtin
Ndërsa e pranon se karriga e kryetarit po i humbet dhe askush më nuk e konsideron të tillë, Ymeri nuk lë pa e thumbuar dhe Kurtin edhe pse nuk ja përmend emrin.
“Lëvizja Vetëvendosje” përbëhet prej aktivistëve e anëtarëve që i bashkon koncepti e programi, ideologjia e praktika politike. Ne të gjithë bashkë i jemi besnik idesë. Jo njeriut. Një organizatë që ka besnikëri ndaj njeriut e jo idesë, devijimin e ka prapa derës. Lëvizja nuk ka devijuar kurrë sepse nuk ka qenë organizatë e tillë. Dhe kështu duhet të mbetet” ka shkruar Ymeri.
Kujtojmë në mbledhjen e të Këshillit të Përgjithshëm morën pjesë 133 delegatë të Vetëvendosjes, ndërsa mungon kryetari në detyrë, Visar Ymeri, ish-sekretari Dardan Molliqaj, dhe deputetët Shqipe Pantina, Ali Lajçi, Aida Dërguti, Donika Kadaj e Albin Kurti (dy të fundit janë në paraburgim). /tesheshi.com/
