Fondi i Inovacionit i NATO-s ka investuar për herë të parë në një kompani bioteknologjie, në një përpjekje për të përmirësuar mbrojtjen kundër kërcënimeve biologjike, tha aleanca ushtarake.
Fondi i NATO-s është një nga investitorët që udhëheqin një raund mbledhjeje fondesh prej 35 milionë dollarësh (29.8 milionë euro) për Portal Biotech, i cili përdor sekuencimin e proteinave për të zbuluar kërcënimet dhe për t’u mbrojtur nga lufta biologjike, raporton Reuters.
Ana Bernardo-Gancedo, një bashkëpunëtore e lartë në Fondin e Inovacionit të NATO-s, tha se aftësitë e Portal Biotech, i cili është i vendosur në Mbretërinë e Bashkuar, janë thelbësore për mbrojtjen dhe sigurinë biologjike.
“Ne besojmë se është absolutisht e domosdoshme të jemi në gjendje të zbulojmë, monitorojmë dhe krijojmë kundërmasa,” tha ajo.
Fondi, i themeluar në vitin 2022 pas pushtimit të Ukrainës nga Rusia, planifikon të investojë më shumë se një miliard dollarë në teknologji që do të përmirësonin mbrojtjen e NATO-s.
Portal Biotech përdor teknologji të asistuar nga inteligjenca artificiale me sensorë biologjikë që mund të punojnë në nivelin e një molekule të vetme në vendngjarje, duke dhënë rezultate brenda disa orësh.
Drejtori ekzekutiv i Portal Biotech, Andy Heron, i tha Reuters se instrumentet e kompanisë mund të zbulojnë çdo patogjen.
“Kjo ju lejon jo vetëm të zbuloni atë që dinit se ishte aty, por edhe të zbuloni atë që nuk dinit”, tha ai.
Përveç biosigurisë, Portal Biotech pret që pajisjet e saj portative të ndihmojnë në zbulimin e barnave dhe mjekësinë precize. /tesheshi.com/
