Në Belgjikë dhe Dubai, shtëpitë e ankandeve po anulojnë ankandet e tyre. De Beers bën të njëjtën gjë dhe anulon rishikimet e gurëve të çmuar. Industria e diamanteve është në krizë. Pse askush nuk dëshiron të blejë më gurët e çmuar më… të përjetshëm?
Në Indi – e cila përpunon 9 nga 10 diamante në botë – tregtarët hezitojnë të blejnë pasi shohin se kërkesa për gurë të çmuar nga Kina dhe SHBA po përkeqësohet me shpejtësi. Është një fenomen i çuditshëm, i lidhur me inflacionin dhe recesionin, që i bën blerësit të duan të frenojnë blerjet derisa ekonomia të balancohet.
Në fund të fundit, është gjithashtu një çështje e ngadalësimit të rritjes globale. Kjo për shkak se diamantet nuk tregtohen si ari apo nafta. Përkundrazi, ato përfaqësojnë një gamë më të gjerë tregjesh në të cilat “shtrihet” përdorimi i tyre, përtej atij të bizhuterive. Ky gur i çmuar i veçantë, për shkak të karakteristikave të tij të veçanta, përdoret në miniera, në prerjen industriale të materialeve, në stomatologji, në industrinë kompjuterike dhe shumë më tepër.
Me eksportuesit e diamanteve që paralajmërojnë për një tremujor shumë të keq përpara për industrinë, “diamantet e gjakut” të Rusisë mund të jenë në gjendje të ndalojnë “gjakderdhjen’ e tregut. Dhe si do të ndodhë kjo? Me recetën… magjike të kërkesës dhe ofertës, të cilës i “servohet”, në një farë mënyre, vazhdimi i sanksioneve ndaj Moskës, ndërkohë që ajo vazhdon luftën në Ukrainë.
Ajo që po shfaqet tani është se G7 po shqyrton ndalimin e Rusisë nga eksportimi i gurëve të çmuar nga minierat e saj të diamantit, si pjesë e masave të presionit për t’i dhënë fund luftës në Ukrainë. Dhe, nëse kjo ndodh, tregu do të përjetojë shpejt një çështje të ofertës, e cila mund të stimulojë kërkesën dhe të rrisë çmimet. Në fakt, Perëndimi po përgatitet të përdorë teknologji të lartë për të gjurmuar origjinën e diamanteve, për të “bllokuar” ato ruse.
Udhëheqësit e shtatë ekonomive më të fuqishme të botës po shqyrtojnë vendosjen e sanksioneve ndaj eksporteve ruse të diamanteve. Çfarë goditje do të jetë kjo për Rusinë, duket nga fakti se në vitin 2021 eksportet e diamanteve i sollën ekonomisë ruse 4.7 miliardë dollarë, duke e bërë atë eksportuesin e 8-të më të madh të diamanteve në planet.
Megjithatë, problemi (?) janë disa vende që e kundërshtojnë një lëvizje të tillë. Jo rastësisht, këto janë vendet që thithin gjithashtu pjesën më të madhe të eksporteve ruse të gurëve të çmuar, si Belgjika, e cila dëshiron të sigurojë që aktivitetet e saj tregtare të mos preken nga vendosja e sanksioneve.
Në fund të fundit, ekziston gjithmonë mundësia që sanksionet të mos arrijnë asgjë përveç zhvendosjes së eksporteve ruse. Analistët pajtohen se kufizimi i eksporteve të diamanteve ruse do të zvogëlojë ofertën e gurëve të çmuar dhe do të rrisë çmimet, por ata nuk përjashtojnë skenarin tjetër: që Moska ta zhvendosë tregtinë në tregje të tjera dhe blerës të tjerë të interesuar. Si për shembull Dubai, i cili ka aftësinë të importojë diamante të shumtë dhe të shtrenjtë. /tesheshi.com/
