Një ditë më parë, bota e gazetarisë shqiptare do tronditej nga fakti se dy emra të njohur të saj, Artan Hoxha dhe Elton Qyno ishin vënë nën akuzë nga SPAK. Dhe sot është zbardhur pseja munduese.
Në një njoftim zyrtar në lidhje me një megaoperacion të ndërmarrë në Elbasan, ku u godit një organizatë kriminale që drejtohej nga Suel Çela, një emër i njohur i krimit në atë qytet, këta dy gazetarë të kronikës së zezë akuzohen për veprën penale “Korrupsion aktiv në sektorin privat”, i kryer në bashkëpunim.
Më saktë, sipas SPAK, shtetasi Suel Çela ka shpërblyer me shuma monetare të paligjshme dy gazetarët të cilët më pas kanë publikuar artikuj dhe video që keqinformonin duke manipuluar opinion publik në favor të organizatës kriminale.
“M.L ka synuar të manipulojë perceptimin publik, duke i paraqitur rivalët e tij si të paprekshëm për shkak të lidhjeve të dyshuara që ata mund të kenë me politikën. Trysnia për hetime pasurore në kuadër të OFL-së dhe nxitja e mediave për të marrë dëshmi nga individë që mund të inkriminojnë rivalët e tij do të krijonin, sipas tij, në opinionin publik perceptimin se këta rivalë, për shkak të lidhjeve të dyshuara politike, janë bërë ‘të paprekshëm’. Kjo strategji, e cila përfshin manipulimin e informacionit dhe ndikimin në opinionin publik, jo vetëm që do të rriste pozitat e tij, dhe në të njëjten kohë do të dëmtonte interesat e rivalëve.
Dyshohet se këto synime M.L i ka realizuar përmes bashkëpunimit me gazetarët A.H. dhe E.Q, të cilët kundrejt përfitimeve monetare të paligjshme kanë mbajtur qëndrime në media, si dhe kanë publikuar artikuj dhe video që keq informonin dhe manipulonin opinionin publik”, thuhet në njoftimin e SPAK.
Ndaj gazetarëve Artan Hoxha dhe Elton Qyno është caktuar masa e sigurisë “Detyrim Paraqitje”. /tesheshi.com/
