Pse Adidas s’do e shesë fanellën gjermane me numrin 44?

Prodhuesi gjerman i pajisjeve sportive Adidas dhe Federata Gjermane e Futbollit (DFB) kanë ndaluar shitjet e fanellës së re kombëtare me numër 44 pas kritikave se ajo i ngjante logos së organizatës naziste SS.

“Ne do të ndalojmë personalizimin e fanellave në dyqanet tona online”, tha Oliver Brueggen, zëdhënësi i Adidas.

Pasditen e së hënës nuk ishte më e mundur të personalizonin fanellat me emra dhe numra personalë. Ndërkohë DFB ka ndërprerë dorëzimin e fanellave me numrin 44 të porositura tashmë në dyqanin online.

Nën zjarr

Përdoruesit e mediave sociale kanë vënë re se numri 44 në fanellën e sapokrijuar, të zbuluar muajin e kaluar, i ngjan logos së Schutzstaffel (SS), një organizatë paraushtarake e kontrolluar nga nazistët dhe Adolf Hitleri.

Për shkak të kësaj, Adidas ishte objektiv i kritikave, por Brueggen pretendon se DFP dhe partneri i saj 11teamsports ishin përgjegjës për hartimin e emrave dhe numrave. U ndalua edhe porositja e fanellave me mbiemra të lidhur me nacionalsocializmin.

“Njerëz nga më shumë se 100 vende punojnë në Adidas, kompania jonë promovon diversitetin dhe përfshirjen. Ne kundërshtojmë ksenofobinë, antisemitizmin, dhunën dhe urrejtjen në çdo formë”, tha Brueggen. “Çdo përpjekje për të promovuar pikëpamje përçarëse ose margjinalizuese nuk është pjesë e vlerave të markës sonë.” /tesheshi.com/