Nga Blendi Gashi
Partia Socialdemokrate e Shpend Ahmetit ka nisur edhe zyrtarisht shtrirjen nëpër komunat e Kosovës. Të shtunën hapi zyrën e saj në qytetin e Gjilanit, ndërsa ka paralajmëruar shtrirje në të gjitha qytetet e tjera.
Edhe pse në tubimin e mbajtur ishin një numër i vogël qytetarësh, kjo nuk i pengoi ish-vetëvendosësit të entuziazmohen dhe të japin fjalë të forta se si me ta “do jetësohet një Republikë qytetare, zhvillimore dhe sociale”.
Më i euforiku nga të gjithë zyrtarët e lartë të PSD-së është treguar njëri nga ish-vetëvendosësit më të fuqishëm, Daradan Molliqaj.
Ai këtë tubim nuk ka ngurruar ta konsiderojë “ortek socialdemokrat”.
“Orteku socialdemokrat u nis sot (dje/të premten) në Gjilan dhe do ta mbulojë tërë Kosovën Ky ortek do ta shkatërroj krimin dhe korrupsionin e instaluar në vendin tonë për vite me radhë, ndërsa qytetarëve do t’ua kthejë shpresën për ditë më të mira”, shkruan Molliqaj në Facebook.
Ndër tjera ai shpreh urime për socialdemokratët gjilanas, ndërsa jep një porosi për komunat tjera.
“Urime dhe suksese të gjithë socialdemokratëve gjilanas për hapjen e zyrës në qytetin e tyre. Komunat tjera le të bëhen gati për…”, shkruan Molliqaj, i cili nuk ishte prezent në tubim.
Pse “orteku socialdemokrat” mund të mos jetë i fuqishëm?
Pavarësisht entuziazmit të Molliqajt, numri jo i madh i qytetarëve gjilanas në themelimin e PSD-së por edhe sondazhet e bëra, tregojnë qartë se në zgjedhjet e reja “orteku socialdemokrat” do jetë i fuqishëm.
Këtë e konfirmon edhe sondazhi i bërë më 13 shtator nga Instituti Demokratik i Kosovës (KDI) ku PSD-në e lë jashtë Kuvendit me një përqindje vetëm prej 2%. Këtë përkrahje qytetare për ish-shokët e idealit e jep në çdo intervistë edhe kryevetëvendosësi Albin Kurti sa herë që pyetet nga qytetarët.
Andaj entuziazmi i shprehur nga PSD-istët mund të kuptohet si një dëshirë e tyre, si dhe frikë ndaj kundërshtarëve, por për të arritur “ortekun” që do t’i “shembte” partitë tjera në zgjedhje, duhet më shumë punë se fjalë.
Dhe për të arritur përkrahje qytetare të paktën prej 5% sa është kalimi i pragut për t’u bërë pjesë e Kuvendit, PSD-ja deri në mbajtjen e zgjedhjeve duhet t’i ndezë fuqishëm motorët pasi i duhet gati edhe dyfish përkrahje sa ka aktualisht.
Megjithatë në zgjedhjet e reja parlamentare, nëse veç garon e vetme, do kuptohet forca reale e PSD-së, pra nëse do jetë një “ortek socialdemokrat”, apo një “puhizë” me 2% me përkrahje qytetare”. /tesheshi.com/
