PS startoi prezantimin e kandidatëve për Lokalet e pjesshme të 6 marsit, duke nisur me Lushnjën.
Me Fatos Tushen pas hekurave nga SPAK, PS zgjedh një grua në synimin për ta rimbajtur bashkinë myzeqare.
Ajo është Eriselda Sefa.
Drejtuesi politik i PS-së për Qarkut e Fierit, Taulant Balla, tha “se Eriselda ka mbështetjen e plotë të kryeministrit dhe qeverisë, për të çuar përpara projektet e qeverisë”.
“Pas 11-12 muaj nga sot ne do kemi hyrë sërish në zgjedhje për bashkitë dhe këshillat bashkiak. Kontrata me qytetarët e Lushnjes do jetë 12 muaj për të provuar se çfarë kemi bërë”, tha Balla.
Ndërsa për palën opozitare, tha se “asnjë minutë të mos merremi me kandidatët e kundërshtarëve”.
“Ne nuk kemi kohë të merremi me ta. Sapo kemi mbaruar një palë zgjedhje”, theksoi Balla.
Por në një sulm të drejtpëdrejtë ndaj dyshes Berisha – Basha, dje bashkë e sot të ndarë, Balla i mbajti bashkë në akuza.
“Kush mendon se Luli dhe Saliu janë ndarë nga njëri-tjetri, e ka gabim pasi janë bashkë. 21 janarin e ka bashkë me Lulin, historinë e detit e ka bashkë me Lulin, te Gërdeci Luli ishte në qeveri. Çështja e 21 janarit nuk mund të mbyllet kurrë për asnjë prej tyre”, tha Balla. /tesheshi.com/
