Një përsëritje zgjedhjesh në Rrogozhinë ka nxjerrë sërish fitues kandidatin socialist, duke sjellë sërish humbje për Berisha-Metajn, me kandidatin e tyre Shkëlqim Hoxha. Edison Memolla i PS-së rifitoi me një diferencë të thellë prej 1792 votash.
Po pse u përsëritën zgjedhjet në Rrogozhinë?
Vendimi për përsëritjen e zgjedhjeve u mor pas padisë së koalicionit opozitar “Bashkë Fitojmë”, që kontestonte rezultatin përfundimtar të këtyre zgjedhjeve dhe vendimin e KAS për njohjen e tyre. Koalicioni opozitar dhe kandidati Shkëlqim Hoxha kontestuan një kuti votimi në Burgun e Rrogozhinës, e cila përmbysi rezultatin në favor të kandidatit të PS-së Edison Memolla. Në kutinë e burgut, e cila u numërua e fundit, nga 92 vota, 80 ishin në favor të Memollës.
Kolegji, ndryshe nga KAS, konkludoi se qendra e votimit e ngritur në burg ishte e paligjshme dhe se KQZ nuk bëri verifikimet nëse ajo plotësonte kushtet ligjore. Pretendimet e opozitës se në këtë qendër ishin lejuar të votonin të burgosur që nuk e kishin të drejtën ligjore për ta bërë këtë, pasi ishin transferuar në këtë burg pasi ishte shpallur lista e zgjedhësve, i gjetën të mbështetura në prova.
Dhe për këtë arsye, dje të burgosurit nuk votuan. E megjithatë, PS e rifitoi Rrogozhinën.
Tashmë sfidë mbetet Kukësi, ku dhe aty do ketë sërish zgjedhje. Por pushteti s’ka bërë ende asnjë hap për kandidatin e ri, i cili do të synojë vendin e lënë bosh nga nammadhi për keq Safet Gjici, dorëhequr pas një videoskandali seksual. /tesheshi.com/
