Një peqinas ka bërë rolin e një dibrani duke i kërkuar kryeministrit Rama se ç’po bëhet me Rrugën e Arbërit:
“Zoti Kryeministër, sot, a u lodhe me këtë rrugë apo jo? Ti sot erdhe dhe është gjithë ajo rrugë, po ky popull që e bën përditë këtë rrugë?!”, u shpreh deputeti I PDIU-së, peqinasi Aqif Rakipi, gjatë ceremonisë së prezantimit të kandidatit të majtë, Muharrem Rama në Dibër. E nga ana tjetër ishte një dibran, Luan Rama nga LSI, që tha:
“Zoti Kryeministër, ndërtojë Rrugën e Arbërit sepse është një nder që e meriton Dibra”.
Kështu pra, e majta është shfaqur e bashkuar gjatë prezantimit të kandidatit për kreun e bashkisë së Dibrës në zgjedhjet e pjesshme vendore të 11 shtatorit, por duke i vënë shefit të qeverisë një kusht, në dukje shumë parimor.
E sakaq, dibrani tjetër, ish-ministri i Financave Shkëlqim Cani, tha se rruga do të ndërtohet.
“Për Kryeministrin kam një falenderim edhe më të madh për mbështetjen edhe më të madhe që do t’i japë Dibrës në të ardhmen e afërt”, tha Cani në të parën paraqitje publike që pas largimit nga detyra e kreut të Financave.
Ndërsa kryeministri Rama, tha se se nuk do të largohej nga detyra pa mbaruar Rrugën e Arbërit.
“Unë e kam premtuar por akoma nuk mund të thoni që nuk e kam bërë. Kam barrën që të bëj gjëra që dëshirojnë të gjithë partnerët e koalicionit. Kjo është detyra ime! Unë nuk ankohem për këtë detyrë sepse e kam marrë me dëshirë të madhe dhe vullnet të madh, por po them këtu që unë nuk do të largohem nga zyra e Kryeministrit pa bërë Rrugën e Arbërit”. /tesheshi.com/
