PS pretendon se ka bërë më shumë se PD për dëmshpërblimin e ish-të përndjekurve politikë. Ishte kjo një temë e diskutuar në parlament, ku kreu i grupit parlamentar të mazhorancës Taulant Balla tha se “kjo maxhorancë pas 2013-ës, është e vetmja që realisht e ka adresuar financiarisht dëmshpërblimin e merituar të atyre që kanë qenë të përndjekur.
“Të gjithë e dimë se ka nga ata që dhe pse kanë qenë të dënuar për vepra të tjera penale, duan të marrin dëmshpërblim. Me ndryshimet ligjore të vitit 2014, i kemi dhënë prioritet likuidimit të kategorisë parësore, pra ata që e kanë vuajtur vet. Ky vendim solli edhe likuidimin e të gjithë shumës.
Gjatë këtyre 6 viteve janë paguar 39 mijë e 162 subjekteve përfituese me 110 mln dollarë. Nga të cilat janë çelur 11 këste për përfituesit e kategorisë parësore. Kjo nuk është bërë për arsye fushatash. Nëse doni, t’ju them jo juve, por atyre të opozitës jashtëparlamentare personalisht, Sali Berishës që është tallur me të përndjekurit. Kjo shumë është shumë më e madhe se sa ka paguar PD në 6 vite”, tha Balla.
Ky fakt u pohua dhe nga deputeti demokrat Murrizi, një anti-komunist i ashpër.
“Është e vërtetë që në qeverisjen tuaj keni dëmshpërblyer, ndoshta edhe më mirë se paraardhësit tuaj”, tha deputeti lushnjar.
Debati ishte rrjedhojë e diskutimit mbi projektligjit “Për disa ndryshime dhe shtesa në ligjin nr. 9831, datë 12.11.2007, “Për dëmshpërblimin e ish të dënuarve politikë të regjimit komunist. /tesheshi.com/
