Një ditë pas përvjetorit të radhës së tragjedisë së 21 janarit, nga PS u kërkua që SPAK të marrë në dorë këtë dosje, për ta rihapur e gjykuar dhe njëherë, nën dritën e fakteve të reja të pretenduara nga gazetari Artan Hoxha. Ky i fundit, dy ditë më parë, tha se i ka rënë në dorë një komunikim mes kreut të Gardës dhe vartësve, ku urdhërohej për t’u qëlluar.
Kryetari i grupit parlamentar të PS-së, Taulant Balla tha “kjo çështje duhet të kishte shkuar me kohë në SPAK”.
“Prej 27 korrikut ka në fakt edhe një kërkesë procedurale nga pala e dëmtuar që e kërkon kalimin e dosjes në Prokurorinë e Posaçme. T’i japim fund pandëshkueshmërisë të atyre që u përfshinë në urdhrat e 21 janarit. Ekspertët e PS-së kanë filluar punën për hartimin e një kallëzimi tjetër penal drejtuar Prokurorisë së Posaçme,” u shpreh Balla.
“Ndërkohë që një tjetër provë e re materiale është publikuar së fundmi. Komandanti i Gardës Ndrea Prendi ka urdhëruar vrasjet, duke zgjedhur edhe vetë vrasësit. Madje duket qartë se ai është urdhëruesi. Berisha nuk e fshehu dot krimin,” theksoi zyrtari socialist, duke shtuar se “Berisha mburret me vrasjet e asaj dite”. /tesheshi.com/
